Онаси билан 15 ёшида Тошкентдан хорижга чиқиб кетган ўсмир халқаро террорчилик ташкилоти сафига қўшилгани учун жиноят иши қўзғатилиб, қидирувга берилди. Бу ҳақда пойтахт ИИББ матбуот хизмати хабар қилди.
Маълум қилинишича, 2000 йилда Тошкент шаҳрида туғилган Ш.Х. 15 ёшида онаси ва икки нафар синглиси билан айланма йўллар орқали, яъни Қозоғистон, Россия, Украинадан ўтиб, Мисрга борган. Ўша йилнинг сентябрида у Мисрдан Туркия орқали Сурияга ўтади.
Ш.Х. жанговар ҳаракатларда қатнашиш мақсадида ИШИД сафига бориб қўшилган. Ҳуқуқ-тартибот идоралари томонидан унга нисбатан Жиноят кодексининг 244-2-моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилган ва қидирув эълон қилинган.
Бундан аввал халқаро террорчилик ташкилоти сафларига қўшилган ўзбекистонлик эркак ва унинг ўғли қидирувга берилгани хабар қилинганди. Шунингдек, қизлари билан халқаро террорчилик ташкилоти жангарилари аъзоси бўлган ўзбекистонлик аёл ҳам қидирилмоқда. Ушбу аёл ҳам Россияда яшовчи эркак билан танишиб, икки қизи билан дастлаб Озарбайжон орқали Туркияга, у ердан эса Сурияга борган ва халқаро террорчилик ташкилотининг жангариларига бориб қўшилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)