Суриядаги жанговар ҳаракатларда қатнашиб келаётган ўзбекистонлик эркакка қидирув эълон қилинди. Бу ҳақда Тошкент вилояти ИИББ ахборот хизмати хабар берди.
Унга кўра, Тошкент вилояти Янгийўл туманида 1991 йилда туғилган В.Ҳ. 2017 йил ишлаш мақсадида Туркиянинг Истанбул шаҳрига кетган. Ижтимоий тармоқлар орқали диний экстремистик ва террористик ғояларни тарғиб қилувчи видео ва аудиолар таъсирига тушиш натижасида 2018 йилда жиҳод қилиш ва Суриядаги жангларда иштирок этиш мақсадида “Тавҳид ва жиҳод катибаси” халқаро террористик ташкилот сафига бориб қўшилиб, ташкилот аъзосига айланган ва у ерда жанговар ҳаракатларда қатнашиб келмоқда.
Ҳозирда ҳуқуқни муҳофаза қилувчи органлар томонидан унга нисбатан Жиноят кодексининг 244-моддаси 3-қисми “г” банди, 155-моддаси ва 159-моддаси билан жиноят иши қўзғатилиб, қидирув эълон қилинган.
Бундан аввал халқаро террорчилик ташкилоти сафларига қўшилган ўзбекистонлик эркак ва унинг ўғли қидирувга берилгани хабар қилинганди. Шунингдек, қизлари билан халқаро террорчилик ташкилоти жангарилари аъзоси бўлган ўзбекистонлик аёл ҳам қидирилмоқда. Ушбу аёл ҳам Россияда яшовчи эркак билан танишиб, икки қизи билан дастлаб Озарбайжон орқали Туркияга, у ердан эса Сурияга борган ва халқаро террорчилик ташкилотининг жангариларига бориб қўшилган.
Изоҳ (0)