Исландиянинг жануби-ғарбий қисмидаги балиқчилар шаҳри бўлган Гриндавикда Фаградалсфядл вулқони уйғонди. Ерости силкинишлари шу қадар кучли бўлганидан маҳаллий аҳолини эвакуация қилишга тўғри келди. Мамлакатда фавқулодда ҳолат эълон қилинди.
Лаванинг ер юзасига чиқиши ва шаҳарнинг чўкиши хавфи бор. Аммо бу қачон содир бўлишини ҳатто мутахассислар ҳам айта олмайди. Гриндавикда аллақачон катта ёриқ пайдо бўлган. Ундан буғ кўтарилмоқда.
Сув таъминоти ва электр тармоқлари шикастланган. Одамларга керакли нарсаларни олиш учун қисқа вақт ичида уйларига қайтишга рухсат берилди.
“Баъзи уйлар шикастланган, баъзилари эса йўқ. Ҳозирча уйимиз яхши, лекин кейин нима бўлишини билмайман. Бизда вазият жуда хавфли”, — дейди гриндавиклик Гуннар Хардарсон.
Маҳаллий аҳолига қидирув-қутқарув гуруҳлари ҳамроҳлик қилмоқда.
“Уйда узоқ вақт қолиш мумкин эмас. Тез ҳаракат қилиш керак: энг қимматли нарсаларни олиб, йўлда давом этиш зарур”, — деди Рейкявик қидирув-қутқарув гуруҳи ходими Гудмундур Арнарсон.
Охирги 24 соат ичида Исландияда рекорд даражадаги 1400 та зилзила қайд этилди. Октябрь ойининг охиридан бошлаб Рейкянес яриморолида сейсмик фаоллик кучайган, у ерда олти минг йил давомида ҳаракатсиз бўлган ўша вулқон жойлашган.
Изоҳ (0)