Бугун, 14 ноябрь куни Олий Мажлис Қонунчилик палатасида бўлиб ўтган навбатдаги мажлисда соғлиқни сақлаш вазири Амрилло Иноятов ҳисобот берди. Унга депутат Дониёр Ғаниев “Док-1 Макс” сиропи билан боғлиқ воқеадан кейин масъулларга нисбатан сиёсий жавобгарлик белгиланиши ва вазирлик қандай хулоса қилганлиги ҳақида сўради.
“Эзгу ниятлар, ажратилаётган маблағларга қарамай, афсуски, тизимдаги қўпол, ўта қўпол хатоликлар туфайли ўнлаб инсонларнинг, болаларнинг ҳаётига зомин бўладиган ҳолатларга гувоҳ бўлдик.
Тизимдаги битта коррупция — дорини тегишли тартибда серитификация қилмаслик оқибатида 65 оила фарзандидан жудо бўлди. Президентимизга раҳмат, буни танқид қилдилар ва “Ҳар битта одам, бунга ким алоқадор бўлса қонун олдида жавоб беради”, дедилар ва биз буни бугун кўриб турибмиз.
Шаффофлик туфайли суд жараёни очиқ ўтказилмоқда. Ҳар битта айбдор, жиноятга шерик бўлганлар қонун олдида жавоб бермоқда. Биз буни олқишлаймиз. Лекин судни кузатиш жараёнида, жабрдийда ота-оналарнинг ғамини, қайғусини кўриб ўзим ҳам йиғладим. Негаки менинг ҳам икки нафар фарзандим айнан мана шу ёшда. Вафот этган болаларнинг биттаси мени ҳам фарзандим бўлиши мумкин эди.
Одамни виждони қийналяпти, депутат сифатида ўз вақтида назоратни тўғри қилмай, эътиборни бошқа томонга қаратганимиз учун ва тизимдаги қўпол хатолик туфайли 65 нафар бола вафот этди.
Энг ачинарлиси, тизимдаги ходимларнинг кўрсатмаларидан маълум бўляптики, пастдаги маълумотни ўз вақтида юқорига етказмаслик оқибатида болаларни сақлаб қолишнинг имкони бой берилган. Минг афсуски, вазирлик томонидан бу ишлар учун сиёсий жавобгарлик тан олингани йўқ. Тегишли мансабдорларга нисбатан жавобгарликни кўрмаяпмиз.
Ўтган ишдан кейин вазирлик қандай хулоса чиқарди? Бизга шу каби қўпол хато қайта такрорланмаслигига ваъда бера оласизларми? Юқоридаги хатони етказмоқчи бўлган пастки тизимдаги ходимнинг жазоланмаслигига, бўлаётган ҳодисалар ҳақида ахборот биринчи раҳбарга ўз вақтида етиб бориши ва унга ўз вақтида чора кўрилишига ваъда бера оласизларми ёки бу ҳолат яна давом этаверадими?”, — деди Дониёр Ғаниев.
Бунга жавобан вазир Амрилло Иноятов депутатнинг эътирозларини 100 фоиз қабул қилиши ва бирор баҳона қилишга асоси йўқлигини айтиб ўтди.
“Шу йилнинг 1 январидан бошлаб битта ҳам бундай ўлим бўлгани йўқ. Чунки, ўткир ичак касаллигидан ёки вирусдан кейин келиб чиқадиган ўткир буйрак етишмовчили касаллигини даволаш имкониятимиз ва етарлича тажрибамиз ҳам бор.
Бу ҳолат бўйича жуда катта хулоса қилганмиз. Шахсан мен биринчи ўринбосар сифатида кеч эшитганман бу мени ҳам катта хатом бўлади.
Бундан буёғига бундай ҳолатлар бўлмаслигига шахсан вазир сифатида бўйнимга олиб, бутун тизимимиз билан биргаликда бундай хатоликларга йўл қўймаслик учун курашамиз. Бундай ҳолатга йўл қўйишга ҳақимиз йўқ. Тан олиб айтаман бу бизнинг кеч билганимиз ва хатомиз”, — деди Амрилло Иноятов.
Суд ишида вазирга “Док-1 Макс” билан боғлиқ воқеалар содир бўлишидан аввал болаларда буйрак етишмовчилиги кузатилгани ҳақидаги маълумот берилгани, аммо вазиргача етиб бормагани айтилган. Судда ушбу ҳолатга жавоб қайтарган вазир ўринбосари Элмира Боситхонова гувоҳнинг бу гапини инкор қилганди.
Адвокатлардан бири “Док-1 Макс” судида сиропдан заҳарланган бемор болалар аҳволига эътиборсиз бўлган шифокорларга қарши жиноий иш очишни сўраган.
Изоҳ (0)