Ўзбекистонда “Док-1 Макс” сиропидан вафот этгани айтилаётган 65 нафар боланинг қабри очилмайдиган бўлди. Суд ҳайъати адвокат Даврон Аҳмадовнинг бу ҳақдаги илтимосномасини рад этгани маълум бўлди. Бу ҳақда 13 ноябрь куни бўлиб ўтган суд мажлисида судья Мусо Юсупов айтди.
Судда сўз олган жабрланувчилардан бири Муштарий Абдураҳмонова болаларнинг қабри очилишига норози эканини айтди.
Менинг болам ўлди ва ҳозир қабрда ётибди. Қабр очилади деган гаплар бўлди. Очилиши шартмаслигига ҳамманинг кўзи етиб турибди. Чунки тирик қолган болалар организмида экспертиза ўтказишнинг ўзи ҳам бўлади-ку, тўғрими? Қабрни очишнинг умуман кераги йўқ. Мен шунга қаршилик билдираман, — деди жабрланувчи Муштарий Абдураҳмонова.
Жабрланувчининг айтишича, боласи вафот этгач, унинг жасади экспертиза қилинган. Такроран марҳум боласининг қабри очилишига норози.
Болам вафот этгач, жасадини қўлимизга беришганида моргга экспертиза учун сўрашганди. Йўқ деганимда, сизнинг бу қарорингиз эртага қабр очилишига олиб келиши мумкин дейишганида, экспертиза учун розилик берганман. Бўлмаса ўша пайтда ҳам боламни қийнаб, экспертиза қилишларига рухсат бермасдим, — деди жабрланувчи.
Жабрланувчининг бу гапларига жавоб қайтарган судья Мусо Юсупов адвокатнинг вафот этган болалар қабрини очиш ҳақидаги илтимосномаси рад этилганини айтди.
Бу илтимоснома рад қилинди ва бошқа бу мазмунда илтимоснома бўлмади, — деди судья.
Судья жабрланувчига юзланиб, судланувчиларга қандай даъвоси борлигини сўради.
Айбдорни топиб, қонунан қарор қабул қилишингизни сўрайман. Буларга бир умрлик қамоқ жазоси ҳам кам, — деди жабрланувчи.
Изоҳ (0)