Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилди. Бу ҳақда вилоят прокуратураси матбуот хизмати хабар берди.
Аниқланишича, у “Ҳар бир оила—тадбиркор дастурини амалга ошириш тўғрисида”ги президент қарори билан берилган фуқароларга имтиёзли кредитлар ажратишдаги махсус ваколатдан мансаб мавқейини суиистеъмол қилиш йўли билан ғаразли мақсадларда фойдаланиб, кредит маблағларини ўзлаштирган.
Хусусан, “Абу Али ибн Сино” МФЙ ҳудудида яшамайдиган ва фаолият кўрсатмайдиган М.Ҳ., Ж.А., Н.Ғ., М.А ва А.М. номига мототранспорт воситаси ҳамда ичимлик сувини қайта ишлаш аппаратини сотиб олиш учун 33 миллион сўмдан, жами 163 миллион сўмлик имтиёзли кредит ажратилишига эришиб, уларни ўзлаштириш йўли билан талон-торож қилган.
Ҳоким ёрдамчиси 14 сентябрь куни Жиноят кодексининг 167-моддаси 3-қисми “г” банди (компьютер техникаси воситаларидан фойдаланиб содир этилган ўзлаштириш ёки растрата йўли билан талон-торож қилиш), 209-моддаси 1-қисми (мансаб сохтакорлиги) ва 209-моддаси 2-қисми “а” банди (такроран содир этилган мансаб сохтакорлиги) билан ишда айбланувчи тариқасида жалб қилиниб, қамоққа олиш тарзидаги эҳтиёт чораси қўлланган.
Вилоят прокуратураси томонидан мазкур жиноят иши тергови алоҳида назоратга олинган.
Изоҳ (0)