Ўзбекистон Марказий банки банк назорат қўмитасининг 10 ноябрдаги қарори билан Brio Group (Оson) масъулияти чекланган жамиятининг тўлов ташкилоти фаолиятини амалга ошириш учун лицензияси амал қилиш муддати қайта тикланди.
Компания лицензиясининг амал қилиш муддати қўмитанинг 17 октябрдаги қарорига асосан вақтинчалик тўхтатиб қўйилганди. Август ойи охирида Марказий банк Оson’ни тўлов операцияларини амалга оширишда жиноятдан олинган даромадларни легаллаштириш ва терроризмни молиялаштиришга қарши курашиш тўғрисидаги қонунни бузгани учун жаримага тортгани маълум бўлган эди.
Brio Group компанияси ОАВда хабарлар тарқалгач, Ўзбекистоннинг 50 дан ортиқ финтех-ташкилотлари Марказий банкдан 5 сентябрдан бошлаб трансчегаравий давлатлараро транзит операцияларини амалга ошириш тақиқланиши ҳақида хат олганини қўшимча қилганди. Бу халқаро пул ўтказмалари бўйича хизматлар кўрсатиш, ўйин хизматлари ва хорижий компаниялар хизматлари учун тўловлар, шунингдек, бир қатор бошқа операциялар амалга ошириш тугатилишини англатади.
“5 сентябрдан биз ва барча тўлов ташкилотларига ҳамма халқаро сервисларни ўчириш мажбуриятини юклашяпти. Жаҳон миқёсидаги йирик компаниялар билан тўғридан тўғри шартномаларимиз бор. Бундан келиб чиқадики, биз регулятор бозорни ёпиб қўяётганига асосланиб, барча келишувларни бир томонлама бекор қилишимиз керак”, — деганди Brio Group бош директори Фарҳод Маҳмудов “Газета.уз”га.
5 сентябрга келиб, Оson тўлов хизмати халқаро пул ўтказмалари ва хорижий хизматлар учун тўловларни вақтинча тўхтатди. Шу куннинг ўзида хизмат Марказий банк жарима санкциялари иши бўйича барча сўровларни қайтариб олишини ва жаримани тўлашини маълум қилди. Ўз навбатида, Марказий банк ҳам содир бўлган воқеаларга муносабат билдирган. Оson тўлов хизмати қабул қилувчи ва жўнатувчи тўғрисидаги талаб қилинадиган маълумотларни қонунчиликда кўрсатилганидек акс эттирмагани учун жаримага тортилди, дейилган регулятор муносабатида.
Изоҳ (0)