Марказий банк валюта операцияларини амалга ошириш қоидаларига киритилаётган ўзгартиришлар бўйича билдирилаётган таклиф ва мулоҳазаларга муносабат билдирди.
Марказий банк Ўзбекистонда валюта операцияларини амалга ошириш қоидаларига ўзгартириш ва қўшимчалар киритишга оид идоралараро қарор лойиҳасини муҳокамага қўйганди. Тузатишларда тадбиркорлик субъектлари томонидан чет эл валютасини харид қилиш устидан назоратни кучайтириш таклиф этилмоқда.
Таъкидланишича, мазкур ҳужжатга киритилаётган ўзгартириш ва қўшимчалар валюта операцияларини чеклаш ёки қатъийлаштиришни эмас, балки амалда мавжуд нормаларга аниқлик киритиш, айрим операцияларни амалга ошириш жараёнини янада соддалаштириш, тарқоқ нормаларни умумлаштиришни назарда тутади.
Хусусан, лойиҳада қуйидагилар назарда тутилмоқда:
- янги қабул қилинган норматив-ҳуқуқий ҳужжатлар талабларига мувофиқлаштириш;
- амалдаги нормаларни турли хил талқин қилиш ҳолатларининг олдини олиш мақсадида, хўжалик юритувчи субъектлар томонидан чет эл валютасини сотиб олишда банкларга тақдим қилиниши лозим бўлган ҳужжатларни аниқ белгилаш;
- чет эл валютасини сотиб олиш буюртманомаларини кўриб чиқиш жараёнини соддалаштириш;
- хўжалик юритувчи субъектлар ҳамда норезидент жисмоний шахсларга валюта операцияларини амалга оширишда қўшимча қулайликлар яратиш;
- банк кассалари орқали мижозларга нақд чет эл валютасини чиқим қилиш билан боғлиқ нормаларни умумлаштириш.
Марказий банк барча оммавий ахборот воситаларига мазкур лойиҳа юзасидан билдирилган таклифлар учун ўз миннатдорчилигини билдиради ва ушбу таклифлар лойиҳани янада такомиллаштириш давомида кўриб чиқилишини маълум қилади.
Эслатиб ўтамиз, сентябрь бошида Ўзбекистон Марказий банки ижтимоий тармоқларда тўлов ташкилотлари учун трансчегаравий пул ўтказмаларига доир ўрнатилаётган чекловлар юзасидан тарқатилаётган хабарларга муносабат билдирганди.
Изоҳ (0)