“Бизнесни ривожлантириш банки”га 300 млн доллар миқдорида маблағ ажратилади

“Аҳолини кичик ва ўрта бизнесга кенг жалб қилишнинг қўшимча чора-тадбирлари тўғрисида” президент қарори лойиҳасига кўра, 2024 йилда 2 миллион аҳоли тадбиркорликка жалб этилади. Ҳужжат билан аҳолини кичик ва ўрта бизнесга кенг жалб қилиш бўйича республика комиссияси таркиби тасдиқланди.

Республика комиссияси (Жамшид Қўчқоров) 2023 йил 15 декабрга қадар:

• ҳудудлар ва давлат дастурлари йўналишлари кесимида 2024 йилда 2 миллион аҳолини тадбиркорликка жалб қилишнинг мақсадли кўрсаткичларини;
• “Бизнесни ривожлантириш банки” АТБ ва “Тадбиркорликни ривожлантириш компанияси” АЖ фаолиятининг асосий мақсадли кўрсаткичларига эришиш бўйича батафсил чора-тадбирларни (тармоқ жадвалларини) тасдиқлайди.

Республика комиссияси аъзолари бир ой муддатда ўзлари бириктирилган ҳудудда ҳар бир туман ва шаҳарга чиққан ҳолда, аҳоли ва тадбиркорлик субъектлари учун ўқув семинарларини ташкил қилади.

Тикланиш ва тараққиёт жамғармаси (Вафоев) бир ой муддатда “Кичик бизнесни узлуксиз қўллаб-қувватлаш” комплекс дастури доирасида лойиҳаларни молиялаштириш учун “Бизнесни ривожлантириш банки” АТБга жами 300 миллион доллар миқдорида, шу жумладан:

• 75 миллион доллар “Бизнесни ривожлантириш банки” АТБнинг устав капиталини оширишга;
• 225 миллион доллар субординар қарз сифатида 15 йил муддатга, 5 йиллик имтиёзли давр билан йиллик 5 фоиз ставкада маблағлар ажратади.

Эслатиб ўтамиз, президентнинг 4 сентябрдаги қарори билан “Қишлоқ қурилиш банк” акциядорлик тижорат банки негизида “Бизнесни ривожлантириш банки” ташкил этилганди. Банк томонидан ваколатли банклар билан биргаликда кичик бизнес лойиҳалари учун қулай шартларда 7 йилгача бўлган муддатларда кредитлар ажратилади.

Шавкат Мирзиёев 18 август куни тадбиркорлар билан очиқ мулоқоти давомида кичик тадбиркорлар “оёққа туриб олиши” ва фаолиятини кенгайтириши учун мутлақо янги ёндашувлар жорий қилиниши, бунинг учун, энг аввало, “Қишлоқ қурилиш банк” “Бизнесни ривожлантириш банки”га айлантирилишини айтганди. Президент ушбу янги банкнинг фаолияти ҳам, ишлаш услуби ва молиялаштириш механизмлари ҳам янгича бўлишини таъкидлаган.