“Аҳолини кичик ва ўрта бизнесга кенг жалб қилишнинг қўшимча чора-тадбирлари тўғрисида”ги президент қарори лойиҳаси билан 2024–2026 йиллар учун “Бизнесни ривожлантириш банки” АТБ ва “Тадбиркорликни ривожлантириш компанияси” АЖ фаолиятининг асосий мақсадли кўрсаткичлари белгиланди.
Хусусан, ҳужжат билан “Бизнесни ривожлантириш банки” АТБ бўйича қуйидагилар амалга оширилади:
- кичик бизнес субъектларига ажратиладиган кредитлар қолдиғини 1,7 баравар ошириш орқали кредит портфелидаги улушини 28 фоиздан 43 фоизга етказиш;
- кичик бизнес лойиҳаларини молиялаштириш учун халқаро молия институтлари ва хорижий хусусий молия ташкилотларидан жами 800 миллион АҚШ доллари миқдорда ресурслар жалб қилиш;
- 300 миллион АҚШ доллари миқдорида облигация (евробонд)ларни халқаро капитал бозорларида муомалага чиқариш;
- 150 мингта кичик бизнес субъектлари фаолиятини йўлга қўйиш ва кенгайтириш.
“Тадбиркорликни ривожлантириш компанияси” АЖ бўйича:
- кичик ва ўрта тадбиркорлик субъектларига кўрсатиладиган молиявий хизматлар ҳажмини 8 триллион сўмдан 14 триллион сўмга етказиш;
- 150 та ўрта корхонага улуш киритиш ва хизматлар ипотекаси асосида 300 та лойиҳани тадбиркорлик субъектларига сотиш;
- ўрта тадбиркорлик субъектлари сонини 2,5 бараварга ошириш;
- 300 миллион АҚШ доллари миқдорида облигацияларни (евробонд) халқаро капитал бозорларида муомалага чиқариш.
Август охирларида Туркиянинг Daily Sabah нашри Ўзбекистонда кичик ва ўрта бизнесни ривожлантириш учун янги қадамлар ташланаётгани ҳақида мақола чоп этилганди. Унда мамлакатда кичик ва ўрта корхоналарни қўллаб-қувватлаш ва ривожлантириш учун кенг қамровли экотизим яратилиши, шу мақсадда “Қишлоқ қурилиш банк” Business Development Банкъга айлантирилгани тўғрисида сўз борган эди.
Изоҳ (0)