Ўзбекистонда энг камида 65 нафар боланинг ўлимига сабабчи экани айтилаётган “Док-1 Макс” сиропи билан боғлиқ жиноят ишини кўриб чиқаётган суднинг навбатдаги мажлисида шу сиропдан заҳарланиб, вафот этган 2,5 ёшли қизалоқнинг онаси кўрсатма берди. Бу ҳақда судда қатнашган “Дарё” мухбири хабар берди.
Суднинг бугун, 13 ноябрь куни давом этган мажлисида “Док-1 Макс” сиропидан заҳарланиб, 2023 йилнинг 19 январь куни вафот этган Солиҳа Маҳманазарованинг онаси Мадина Тўлбоева кўрсатма берди.
Қизим касалликларни енгадиган, соғлом ва овқатдан бош тортмайдиган қиз эди. Сурункали касаллиги йўқ эди. Ноябрь ойида (2022 йилнинг ноябрь ойи назарда тутилмоқда. Таҳририят изоҳи) грипп бўлгани учун бир ҳафта боғчадан олиб қолиб, тузатдим ва боғчага чиқариб юбордим. Боғчада яна йўтал юқтиргач, антибиотик олдирмай, сиропдан тузатай деб, дорихонадан “Линкас” сўрадим. Аптекада “Линкас” йўқлиги учун дорихона сотувчиси унинг ўрнига “Док-1 Макс”ни тавсия қилди. Аптекачи таниш бўлгани учун унинг маслаҳатига қулоқ солдим. Ва ўзим ҳам ичсам бўладими йўталимга, деб сўрадим. Бўлади, деди. Уйга қайтгач, ўзим ҳам бир қопқоқ ичдим. Кичик қизимга белгиланган дозада бера бошладим. Катта қизим ҳам дорига қизиқа бошлагач, унга ҳам ялатганман. Дори кичик қизимга яхши таъсир қилиб, қизимнинг иссиғи тушиб, ўйнай бошлади, — дейди марҳум Солиҳанинг онаси Мадина Тўлбоева.
Жабрланувчи онанинг айтишича, у марҳум қизига сироп яхши таъсир қилаётгани учун турмуш ўртоғидан яна шу сиропдан олиб келишни сўраган.
Сиропнинг бир флаконини ичиб тугатдик. Шундан сўнг, хўжайинимга дадаси, шу яхши дори экан, Тамара опадан, аптекачи эди, сўранг ва шу доридан олиб келинг, дедим. Янги олиб келинган флакондан бир маҳал қизимга бергач, Telegram’даги курсдошлар гуруҳида шу дорини берманглар, деган хабар келди. Мен шу дори расмини олиб, мен болаларимга бераётгандим, дедим. Шундан сўнг қизимни кўтариб, поликлиникага бордим ва шу дорини кўрсатиб, шу доридан ичирганман, дедим. Доктор таниш эди, ваҳима қилма, болаларда грипп шунақа ўтяпти, антибиотик олсанг, тузалиб қоласан, деди. “Сефтраксион”дан икки кун олгач, болам ҳолсизланиб қолди. Шундан сўнг яна поликлиникага бордим. Фойдаси бўлмаяпти, дедим. Унда осма укол оласан, дейишди. Осма укол олдирмайман, деганимдан сўнг, туман шифохонасига олиб бор, дейишди. Туман шифохонасида яна осма укол ёзишди. Биринчи осма уколдан сўнг, иккинчиси кетмай қолди. Боламнинг оёқлари шишиб чиқди. Сийишдан ҳам тўхтаган эди, — дейди жабрланувчи.
Мадина Тўлбоеванинг айтишича, шундан сўнг у боласини Қарши шаҳридаги хусусий клиникага олиб борган. Клиника боланинг аҳволидан қўрқиб, уни қабул қилмаслигини, болалар шифохонасига олиб бориши кераклигини айтган. Болалар шифохонасидаги шифокор ҳам икки қўлини кўтариб, бу беморни қабул қилмаслигини айтган.
Врач қўлини кўтариб қабул қилмайман, дегач, боламни кўтариб, тез ёрдамга бордим ва шифохонада боламга шу дорини (“Док-1 Макс” сиропи назарда тутилмоқда. Таҳририят изоҳи) ичирганман ёрдам беринглар, деб бақириб йиғладим. Шундан сўнг боламни бирдан УЗИга олиб кириб кетишди. Бу шифохонада ҳам бир доктор даволайман деса, яна бири бизда катталар учун диализ бор, кичикларники йўқ, болани Самарқанд ёки Тошкентга олиб кетасан, дейишди. Мен доктор қўшиб берасиз, дедим, — дейди жабрланувчи она.
Онанинг қўшимча қилишича, шифохона масъуллари ўша куни бемор бола учун машина ва шифокор ажратиб, пуллик хизмат нархини ҳам келишган ва уларни Тошкент шаҳрига олиб келган.
Бизни 16-шифохонага жойлаштириб кетишгач, болам беш кунда комага тушди. Болам яхшими, деб врачлардан сўрайман. Улар қизинг яхши бўлса, реанимацияда ётмайди, дейишади. Шу-шу қизим 2023 йилнинг 19 январь куни вафот этди. Менинг нима айбим бор эди, қизимнинг ҳам бошқа болалар каби ўйнаб-кулиб юришга ҳаққи бор эди-ку. Антибиотик олдирмай деб, сиропга ишонгандим. Мен қизим қатори гўрга кирган онаман, уйимдаги қизим учун яшаб юрибман, — деди.
Жабрланувчи суддан айбдорларга оғир жазо берилишини сўради.
Изоҳ (0)