Ўзбекистонда камида 65 нафар боланинг ўлимига сабабчи экани айтилаётган “Док-1 Макс” сиропи билан боғлиқ машмашаларни кўриб чиқаётган суднинг навбатдаги мажлисида мазкур сироп ишлаб чиқарувчиларининг яна бир дориси “Амбронол” сиропидан заҳарланган болага шифокорлар томонидан гeпатит ташхиси қўйилиб, нотўғри даволангани айтилди. Бу ҳақда судда қатнашган “Дарё” журналисти хабар берди.
Суднинг навбатдаги мажлисида 2019 йил Сурхондарё вилоятининг Қумқўрғон туманида туғилиб, 2023 йилнинг 25 апрель куни Тошкент шаҳридаги шифохонада вафот этган марҳум — Ҳумоюн Эркиновнинг отаси сўралди.
2022 йил 18 декабрь куни ўғлимнинг мазаси бўлмагани сабаб онаси ўзимизнинг ҚВПга олиб боради. Болага осма укол буюришади. Биринчи осма укол ўша ерда олинади. Кейин уйга қайтгач, бола яна йиғлайвергач, яна қайтариб борилади ва иккинчи осма қилинади, — дейди ўғлининг “Амбронол” сиропидан вафот этганини айтган жабрланувчи.
Жабрланувчи отанинг судда айтишича, безовта бўлган фарзанди Қумқўрғон туман тиббиёт бирлашмасига олиб борилгач, шифокорлар унга гепатит касаллиги ташхисини қўяди.
Топширилган анализни алмаштириб юборган шифокорлар болани сариқ касал деб, “инфексионний”га олиб ўтишади. Юқумли касалликлар шифохонасида ўғлимга яна осма укол қилинади, сариқ касаллиги бўлса, ювилади деб. У ерда уч-тўртта осма укол қуйилганидан сўнг, болага осма укол ҳам кетмай қолади, — дейди у.
Боласи вафот этган отанинг айтишича, туман тиббиёт бирлашмасидан ҳам натижа чиқмагач, у ўғлини Шошилинч тез тиббий ёрдам марказининг Термиз шаҳар филиалига олиб боради.
Термиздаги болалар шифохонасида болани ўткир буйрак етишмовчилиги қийнаётганини айтишди. Аниқлангандан сўнг диализ қиламиз дейишди. Лекин Ф4 флаконли “децкий” филтр топилмади ва бир кун қолиб кетдик. Боланинг аҳволи оғирлашди. Диализ қилиш имкони бўлмагач, 21 декабрь куни соат 11-12 атрофида боламни олиб Тошкентга йўл олдик. Ва ўша куни соат 18:00 ларда етиб келдик. Боламни бир кун кузатишди. Эртаси куни сиймай қолгани учун гемодиализ қилишди, — дейди ота.
Айтилишича, бемор бола 2022 йил 21 декабрдан бошлаб Тошкент шаҳридаги 16-шифохонада даволанган. 2023 йил 23 январь куни шифохонанинг жонлантириш бўлимида ётган бола Болалар миллий тиббиёт марказига ўтказилган.
Болалар миллий тиббиёт марказида ҳам худди шу ташхис билан даволаб боришди. 2023 йилнинг 25 апрель куни вафот этди. Болам беш ой шу касаллик билан курашди, — дейди жабрланувчи.
Изоҳ (0)