Вазирга “Док-1 Макс” билан боғлиқ воқеалар содир бўлишидан аввал болаларда буйрак етишмовчилиги кузатилгани ҳақидаги маълумот берилгани, аммо вазиргача етиб бормагани айтилмоқда

Ўзбекистонда камида 65 нафар боланинг ўлимига сабабчи деб қаралаётган “Док-1 Макс” сиропи билан боғлиқ машмашалардан аввал бемор болаларда буйрак етишмовчилиги кузатилган. Масъуллар бу ҳақда ўша вақтда соғлиқни сақлаш вазири сифатида ишлаб келган Беҳзод Мусаевга маълумот тайёрлаган ва олиб борган. Бироқ, маълумотлар вазиргача етиб бормаган.

“Док-1 Макс” судининг 2023 йил 27 октябрь куни бўлиб ўтган мажлисида сироп билан боғлиқ воқеалар юз берган пайтда Соғлиқни сақлаш вазирлиги таркибидаги Оналик ва болаликни муҳофаза қилиш бош бошқармаси бошлиғи сифатида фаолият юритган Севара Убайдуллаева сўроқ қилинди. 

Беҳзод Анваровичга 2022 йилнинг 22 ноябрь куни ўтказилган семинар расмларини Telegramъдан юборганман ва “Биз ОПН — буйрак етишмовчилиги бўйича семинарлар ўтказяпмиз. Ҳаммани ўқитиб, эрта аниқлаб, тўғри йўналтиришни ўргатяпмиз”, дедим. “Маъқул дедилар”, дейди прокурорнинг собиқ вазир вазиятдан қачон хабар топгани ҳақидаги саволига жавоб берган гувоҳ.

Гувоҳга кўра, собиқ вазирнинг тиббиёт соҳаси вакили эмаслиги унинг маълумотларга унчалик эътибор бермаслигига олиб келган.

Улар (собиқ соғлиқни сақлаш вазири Беҳзод Мусаев назарда тутилмоқда — таҳририят изоҳи) тиббиёт соҳасидан сал йироқроқ бўлгани учун ОПНга унчалик эътибор қилмадилар. Шундан сўнг 15—16 декабрь кунлари менга чиқиб, “Сенинг хабаринг борми, менга ҳозир шунақа дейишяпти. Бу оғир касал экан”, деди. Мен “Бу касалликни беморларда буйрак етишмовчилиги пайдо бўлаётган пайтда сизга хабар қилгандим, бу нарсанинг устида ишлаётгандик. Болаларни сақлаб қолишга ҳаракат қилаётгандик” дедим, — дейди гувоҳ вазирга бу ҳақда аввалроқ хабар берганини айтар экан.

Гувоҳ Севара Убайдуллаева бемор болаларда буйрак етишмовчилиги билан боғлиқ ҳолатлар ҳақида маълумотларни тўплагач, уларни вазир ўринбосари Элмира Боситхоновага берганини, тўғридан тўғри вазирга маълумот олиб кириш ваколатига эга бўлмаганини айтди. 

Тўғрисини айтиш керак, мен ўша пайтда янги ишга келганим боис тўғридан тўғри Боситхоновага бўйсунардим ва вазирга ортиқча киролмасдим. Фақат бир-бир Telegram орқали маълумотларни киритиш имконига эга эдим. Барча маълумотларни Боситхоновага етказардим. Улар ўзим етказаман, сенинг киришингга ҳожат йўқ деганди, — дейди гувоҳ.

Севара Убайдуллаеванинг судда кўрсатма беришича, собиқ вазир “Док-1 Макс” воқеалари юзасидан TVда чиқиш қилиб, халққа мурожаат қилиб бўлгач, унга қўнғироқ қилиб “Нега бўлаётган воқеалар ҳақида менга вақтлироқ кириб айтмадинг, тушунтирмадинг”, дея дакки берган. 

Мен ҳамма маълумотни Боситхоновага киритгандим. Улар субординация бўйича маълумотларни ўзлари киритишлари керак эди. Ўзим тақдим қиламан, сенинг киришингга ҳожат йўқ деб айтган, деб айтдим, — дейди гувоҳ.

Гувоҳнинг қўшимча қилишича, у Элмира Боситхоновага вазирдан дакки эшитганини айтгач, вазир ўринбосари “Тўғри, сиз ҳаракат қилдингиз, мен сал эътиборсизлик қилдим”, деган. Судда ушбу ҳолатга жавоб қайтарган вазир ўринбосари Элмира Боситхонова гувоҳнинг бу гапини инкор қилди.