Ўзбекистонда энг камида 65 нафар боланинг ўлимига сабабчи дея қаралаётган “Док-1 Макс” сиропи билан боғлиқ жиноят ишини кўриб чиқаётган суднинг навбатдаги мажлисида марҳум болаларнинг ота-онаси — жабрланувчилар тингланди. Бу ҳақда судда қатнашган “Дарё” мухбири хабар берди.
Судда “Док-1 Макс” сиропини ичиши ортидан заҳарланиб, вафот этгани айтилаётган марҳума икки ёшли Азиза Рустамованинг онаси сўралди.
Болам соғлом эди, шамоллаб қолгани боис уколини олгандик. Бир ҳафтада яна касали қайталади. Шифокорга борганимизда дори ёзиб берди, дорилар ичида сироп ҳам бор эди. Рецептни олиб, дорихонага кирдим ва ёзилганларни беришни сўрадим. Биринчи дорихонадан дорилар тўлиқ чиқмагач, Ўртасаройдаги “Наврўз” деган жойга бордим, ўша ердан топарман дедим. Аптекачи сироп берди, бу бошқача дори-ку, нега доктор ёзмаганини беряпсан, дедим. Иккаласи бир хил, унинг ўрнига бу яхши (“Док-1 Макс” сиропи назарда тутилмоқда. Таҳририят изоҳи) деди, — дейди “Док-1 Макс” сиропини дорихона ходими тавсиясига кўра олганини айтган жабрланувчи.
Азиза Рустамованинг онасига кўра, қизи “Док-1 Макс” сиропини кунига уч маҳалдан истеъмол қилган.
Иссиғи чиқавергач, 2022 йилнинг 13 декабрь куни қизимни поликлиникага олиб бордим. Грипп, ҳозир грипп кучайган, дейишди. Ва қайтарди. Яна бордим, яна дорини беришди. Укол бердик. Аммо барибир иссиғи чиқаверди. Кейин эраталаб илгир бўлгандир деб, олиб бордим. Илгирмас бу, докторга олиб боринг, дейишди. Шундан сўнг Нурафшондаги поликлиникага олиб бордим. Болам сиёлмай қолганини айтдим. Боланг грипп, шифохонага ёт, аҳволи оғир, дейишди. Болангнинг суви қолмаган, дея “капелница” улашди. Доктор кирди, унга ҳам айтдим. У ҳам “капелница” ёзди. Кейин “Орса” беринг, дейишди. “Орса” бердим, болам қайт қилаверди. Шундан сўнг ҳамшира боламнинг аҳволи оғирлигини, чўчиб тушаётганини айтди. Шундан сўнг болам жонлантириш бўлимига ётқизилди, — дейди воқеа ҳақида гапириб берган онаизор.
Жабрланувчининг қўшимча қилишича, у шифохонада анча сарсон бўлган. Шифокорлар болани нима безовта қилаётганини билмаган.
Боламни асраб қолинглар, ўлиб қолади, деб йиғладим. Ошқозонини ювинг, балки ошқозонидан дедим. Ошқозонини ювишди. Шундан сўнг боламнинг кўзи очилди. Шу сабаб Тошкентдаги 16-шифохонага олиб келдим. У ерда боламга диализ қилишди. Болам эрталаб комага тушди. Сиймаётгани сабаб почкасига катетер улашди. Шифохонада катетер топилмайди. Кечаси ярим тунда дадаси топиб борди, — дейди “Док-1 Макс” судида сўралган жабрланувчи.
Жабрланувчи боласининг ўлимига шифокорлар малакаси етишмаслиги ҳам сабаб бўлганини айтмоқда.
Докторларга айтадиганим, масъулиятини ҳис қилиб қарашсин бемор болаларга, кўзи етмаса бошқа докторга юбориши керак. Болам ўлди, мана, — дейди у.
Аввалроқ “Док-1 Макс” ишлаб чиқарувчилари сиропни беморларга тавсия қилиб келган шифокор, ҳамшира ва дорихона ходимларини доимий рағбатлантириб келгани маълум бўлганди. Солиқ қўмитаси вакилининг сўзига кўра, ишлаб чиқарувчилар “Док-1 Макс” сиропини беморларга тавсия қилган ва унинг кўпроқ сотилишига ҳисса қўшган шифокорларга 5 миллиард 57 миллион сўмлик рағбат пули тўлаган. Шифохонадаги эмлаш ҳамшираларига эса бу хизмати учун 122 миллион сўмлик мукофот пуллари берган. “Док-1 Макс” сиропини бошқаларга нисбатан яхши ва кўпроқ сотган дорихона сотувчилари ва раҳбарларини муокофотлаш учун эса 2 миллиард 345 миллион сўм маблағ ажратган.
Изоҳ (0)