Ўзбекистонда энг камида 65 нафар боланинг ўлимига сабабчи дея қаралаётган “Док-1 Макс” сиропи бўйича 2023 йилнинг 11 август куни бошланган суд 2023 йилнинг 1 ноябрь куни жабрланувчиларни тинглаш билан давом этди. Судда сўз олган жабрланувчилардан бири фарзанди ва турмуш ўртоғининг ўлимига сабаб бўлган сироп воқеаси келтириб чиқарган моддий зарарни ундириш учун 2 миллиард сўм талаб қилаётганини маълум қилди.
Мен энг катта суммани сўрайман. Мана шулар миллиард-миллиард еганми? Энди мана шу болам отасиз ўсса-да, ҳеч нарсага муҳтож қилмасдан катта қилишим керак. Ҳозир ижарада яшайман, — дейди “Док-1 Макс” сиропидан вафот этгани айтилаётган 4 ёшли боланинг онаси.
Жабрланувчи аёлнинг маълумот беришича, у вафот этган боласи ва бу воқеа ортидан оламдан ўтган турмуш ўртоғининг ўлими учун суддан 2 миллиард сўм таъминот сўрайди.
Биласизми, мен боламни туғиб катта қилишим учун қанча азоб чекканман? Қолаверса, энди турмуш ўртоғим ҳам йўқ. Унинг қарзлари бор. Боламни даволатиш учун катта қарз ҳам олгандик. Шу сабаб моддий зарар учун 2 миллиард сўм сўрайман, — деди жабрланувчи.
2015 йил туғилган қизи шу сироп сабаб вафот этган жабрланувчи Файзуллаева эса судланувчиларга ҳам “Док-1 Макс” сиропи берилиши кераклигини айтмоқда.
Энг оғир жазони сўрайман. Нафсининг қули бўлиб ўтказган дориларини ўзларига ҳам беринг, ичишсин. Кўзларидан, қулоқларидан йиринг келиб, қийналсин ўзлари ҳам, — дейди жабрланувчи Файзуллаева.
Эслатиб ўтамиз, аввалроқ адвокат — Даврон Аҳмадов вафот этган 65 нафар боланинг жасадини эксгумация қилиш (қабрни очиб, жасадда тадқиқот ўтказиш, Таҳририят изоҳи)ни сўраганди. Суд ҳайъати бунга жавобан томонлар фикрини тинглаб, илтимоснома бўйича бугун хулоса қилинмаслигини, Самарқандда бир неча марҳум болалар эксгумация қилинганини айтиб, “Шу хулосаларни олиб, жабрланувчиларнинг фикрларини инобатга олган ҳолда кейинроқ хулоса чиқарамиз”, — деди.
Изоҳ (0)