АҚШ Давлат департаменти Руминияга 2,53 миллиард долларга 54 та М1А2 Abrams танклари ва жиҳозларини сотишни маъқуллади, дейилади Пентагон Хавфсизлик Ҳамкорлиги бошқармаси (DSCА) пресс-релизида.
Бу борада Конгрессга тегишли билдиришнома юборилди. DSCА Америка танкларини сотиш Руминиянинг жорий ва келажакдаги таҳдидларга қарши туриш қобилиятини яхшилашига, шу билан бирга “минтақадаги кучларнинг ҳарбий мувозанатини ўзгартирмаслиги”га ишонтирмоқда.
“Таклиф этилаётган танкларни сотиш Европадаги сиёсий ва иқтисодий барқарорлик учун муҳим куч бўлган НАТО иттифоқчиси хавфсизлигини яхшилашга ёрдам беради ва бу орқали Қўшма Штатларнинг ташқи сиёсати ва миллий хавфсизлик мақсадларини қўллаб-қувватлайди”, — дейилади департамент хабарида.
Январь ойида АҚШ расмийлари 101-ҳаво-десант дивизияси бригадаси Руминияда бўлишини яна тўққиз ойга узайтирди. АҚШ аскарлари 2022 йил бошида НАТОнинг шарқий қанотини мустаҳкамлаш учун мамлакатга киритилган.
Апрель ойида Руминия Мудофаа вазирлиги 54 та модернизация қилинган Америка Abrams танкларини сотиб олиш учун парламентдан рухсат олишни сўраган эди.
Изоҳ (0)