АҚШ Давлат котиби Энтони Блинкен Вашингтон Киевга 1 миллиард доллардан ортиқ қўшимча ёрдам беришини маълум қилди. Бу ҳақда у Киевга ташрифи якунлари бўйича Украина ташқи ишлар вазири Дмитрий Кулеба билан бўлиб ўтган матбуот анжуманида айтди.
“Бугун биз бир миллиард доллардан ортиқ янги ёрдамни эълон қиламиз. Бу 665,5 миллион долларлик янги ҳарбий ва фуқаролик хавфсизлиги ёрдамини ҳам ўз ичига олади”, — деди Блинкен.
У АҚШ Украинани қўллаб-қувватлашда давом этишини қўшимча қилди.
Умуман олганда, АҚШ Давлат котибининг сўзларига кўра, Россиянинг Украинага кенг кўламли босқини бошланганидан бери Вашингтон Киевга хавфсизлик соҳасида ёрдам бериш учун 43 миллиард доллардан ортиқ маблағ ажратган.
Ўз навбатида, Кулеба АҚШ Давлат котиби билан Киев бир неча ойдан бери Вашингтондан сўраб келаётган узоқ масофали ATACMS ракеталарини Украинага етказиб бериш имкониятини муҳокама қилганини айтди.
“Ушбу вариант очиқ қолмоқда. Умид қиламанки, АҚШ маъмуриятидаги муҳокамалар ижобий қарорга олиб келади”, — деди Украина ТИВ раҳбари.
Энтони Блинкен Россиянинг Украинага кенг кўламли босқинидан кейин Киевга учинчи расмий ташриф билан келди. 6 сентябрь куни у урушда ҳалок бўлган украиналиклар дафн этилган Берковец қабристонига ташриф буюрди.
АҚШ Давлат котибининг Киевга ташрифи фонида Пентагон Американинг Abrams танклари учун Украинага сўндирилган уранли снарядлар етказиб берилишини эълон қилди. Abrams танкларининг биринчи партияси Украинага сентябрь ойи ўрталарида етиб келиши кутилмоқда, деб ёзади Politico.
Изоҳ (0)