Американинг Abrams танклари келаси ҳафта Украинага етиб боради, деди АҚШ президенти Жо Байден Оқ уйда украиналик ҳамкасби Владимир Зеленский билан учрашувда. Бу ҳақда Тhе Washington Post хабар бермоқда.
Байден Украинага навбатдаги ҳарбий ёрдам пакетини бериш маъқулланганини таъкидлади. Давлат котиби Антони Блинкеннинг тегишли баёнотидан маълум бўлишича, Киевга жами 325 миллион долларлик қурол ва жиҳозлар тақдим этилади, пакетга ҳаво мудофааси ва танкка қарши мудофаа тизимлари, артиллерия ва кассетали ўқ-дорилар киритилади.
Пентагон Украинага бериладиган ёрдам таркибига аниқлик киритди:
- АИМ-9 Sidewinder ракеталари ва ҳаво мудофааси учун Авенгер зенит-ракета тизимлари;
- Javelin ва АТ-4 танкка қарши тизимлари;
- HIMARS учун ўқ-дорилар, 155 ва 105 миллиметрли снарядлар ва бошқалар.
The New York Times газетасининг ёзишича, Зеленский Байденга янги ёрдам учун миннатдорлик билдириб, пакетда Украина аскарларига ҳозир айни керак бўлган қуроллар борлигини таъкидлаган. АҚШ президенти Киев Конгрессдан молиялаштиришни давом эттириш учун кафолат оладими, деган саволга жавоб берар экан, бу вазиятда қонун чиқарувчи орган “соғлом ақлга таянишини” айтган.
Ўз навбатида, Зеленский Америка раҳбари билан келажакда “янги агрессия”нинг олдини олиш учун стратегик ечим, шунингдек, “Украинанинг мудофаа қобилиятини мустаҳкамловчи янги келишув”ни муҳокама қилганини таъкидлади.
Байден январь ойида Украинага 31 та Abrams танкини етказиб беришни ваъда қилганди. Киев М1А2 замонавий версияларни эмас, эски моделлар — М1А1 ни олади. Politico хабар беришича, Украинага дастлаб 10 та танк етказилади. Ушбу партия ҳозир Германияда таъмирланмоқда. Шунингдек, Германияда май ойида Украина Қуролли кучларини Abrams танкларини бошқаришга ўргатиш бошланганди.
Украина АҚШдан узоқ масофали ATACMS ракеталарини ҳам сўрамоқда, бироқ Байден ҳали бу қадамни қўйишга қарор қилгани йўқ, деди унинг миллий хавфсизлик бўйича маслаҳатчиси Жейк Салливан. Келажакда бундай имкониятни инкор этиб бўлмайди, деб қўшимча қилди у.
Изоҳ (0)