“АҚШнинг Яқин Шарқдаги базаларига қилинган ҳужумлар учун жавоб зарбаси берилади” — Пентагон раҳбари Ллойд Остин

Америка Қўшма Штатлари Яқин Шарқдаги базаларига қилинган ҳужумлар учун Вашингтон танлаган вақтда жавоб бериши мумкин.

Бу ҳақда Пентагон раҳбари Ллойд Остин Ҳиндистон пойтахтида журналистлар билан учрашувда айтиб ўтди.

“Халқимизнинг хавфсизлиги — бизнинг устувор вазифамиз. Қачон зарба беришимизни олдиндан айтиб бера олмаймиз ёки лойиҳалаштира олмаймиз. Биз буни ўзимизга қулай вақтда қиламиз. Бизнинг объектларимиз ва одамларимизга ҳужумлар тўхтатилиши керак”, — деди у.

Аввалроқ АҚШ Ҳарбий-ҳаво кучлари Сурия шимолидаги қурол-яроғ омборига, Исроил қўшинлари эса мамлакат жанубидаги нишонларга ҳужум уюштиргани хабар қилинганди.

Пентагон раҳбари Ллойд Остиннинг таъкидлашича, АҚШ Эрон ислом инқилоби муҳофизлари корпуси томонидан фойдаланиб келинган объектларга зарба берган. Бунинг фонида Американинг Сурия ва Ироқдаги базалари яна ҳужумга учраган, Яманда эса АҚШга тегишли дрон уриб туширилган.