Россия президенти Владимир Путин Қозоғистон раҳбарининг Остонадаги қароргоҳида президент Қосим-Жўмарт Тўқаев билан расмий учрашув ўтказди, деб хабар беради Кремль матбуот хизмати. Бу икки давлат раҳбарларининг 2023 йил давомида бешинчи маротаба учрашишидир.
Қайд этилишича, музокаралар давомида Қосим-Жўмарт Тўқаев Қозоғистон ва Россия стратегик шерик ва иттифоқчи эканини, қишлоқ хўжалиги соҳасида улкан истиқболга эга ҳамкорлик олиб боришларини билдирган. Унинг таъкидлашича, 2022 йилда қишлоқ хўжалиги маҳсулотлари айланмаси ўсиб, 3,6 миллиард долларга етган. Шунингдек, у Қозоғистон ва Россияга дунёда экин майдонларининг деярли 10 фоизи, яйлов ва пичанзорларнинг 9 фоизи тўғри келишини таъкидлаган.
Қозоғистон президенти ўз мамлакати ЁИИнинг ўғит бозорида Россия билан рақобатлашмаслиги керак, деб ҳисоблайди. У мамлакатлар озиқ-овқат хавфсизлигини таъминлаш бўйича саъй-ҳаракатларни мувофиқлаштириш муҳимлигини маълум қилди. Тўқаев Владимир Путинга қишлоқ хўжалиги инновацион марказларида ишлашни таклиф қилди.
Владимир Путин, ўз навбатида Қозоғистон билан савдода миллий валюталардан фойдаланиш сезиларли даражада кенгайганини қайд этган. У Қозоғистон билан қишлоқ хўжалиги соҳасида савдо ва инвестиция алмашинуви “динамик равишда ўсиб бораётганини” ҳамда Россия Қозоғистонга қишлоқ хўжалиги маҳсулотларини етказиб беришда давом этишини таъкидлаган.
Президентлар, шунингдек, юзма-юз ва кенгайтирилган форматда — делегациялар иштирокида мулоқот ўтказади. Бундан ташқари, қатор ҳужжатларни имзолаш режалаштирилган. Кремлнинг хабар беришича, Россия ва Қозоғистон раҳбарлари икки томонлама ҳамкорлик истиқболлари ва долзарб халқаро муаммоларни муҳокама қилади.
Россия президенти Владимир Путин 12 октябрь куни Бишкекка келганди. Қирғизистонда икки кунлик расмий ташрифи доирасида у МДҲ давлатлари раҳбарлари кенгаши мажлисида иштирок этган ва бир қатор икки томонлама учрашувлар ўтказганди.
Изоҳ (0)