Исроил бош вазири Биньямин Нетаньяху яна бир бор Ғазо секторида ўт очишни тўхтатиш фақат бир шарт —ҲАМАС томонидан гаровга олинганларни озод қилиш шарти билан рўй бериши мумкинлигини маълум қилди.
“Биз ҳар томондан эшитаётган ҳар хил ёлғон миш-мишларни рад этган ҳолда бир нарсага яна ойдинлик киритмоқчиман: гаровга олинганлар озод этилмагунча ўт очиш тўхтатилмайди”, — дейди Нетаняху.
Шу билан бирга, асирга олинган барча ёки улардан фақат бир қисмини озод этишни назарда тутганми, ноаниқлигича қолмоқда. Аввалроқ Ғазо секторида гаровга олинган 15 кишини озод қилиш эвазига ўт очишни тўхтатиш бўйича музокаралар давом этаётгани ҳақида тасдиқланмаган хабарлар тарқалган эди.
Бу иддаоларга жавобан Исроил мудофаа армияси матбуот котиби Даниэль Хагари шундай деганди: “Бизни чалғитишларига йўл қўймаслигимиз керак. Ҳеч қанақа ўт очишни тўхтатиш йўқ. Биз ҲАМАС билан курашяпмиз. Ҳеч қандай сулҳ бўлмайди”.
АҚШ президенти Жо Байден Исроил бош вазири Биньямин Нетаньяху билан 6 ноябрь куни ўтказган мулоқотида ҲАМАС томонидан қўлга олинган асирларни озод этиш учун уни Ғазода ўт очишни уч кунга тўхтатиб туришга чақирганди. Нетанхаю Байденга бундай вариантга қарши эканини, чунки ҲАМАСга ишонмаслигини ва улар битимнинг ўзига тегишли қисмини бажармаслигини билдирган.
Изоҳ (0)