Rossiya prezidenti Vladimir Putin Qozog‘iston rahbarining Ostonadagi qarorgohida prezident Qosim-Jo‘mart To‘qayev bilan rasmiy uchrashuv o‘tkazdi, deb xabar beradi Kreml matbuot xizmati. Bu ikki davlat rahbarlarining 2023-yil davomida beshinchi marotaba uchrashishidir.
Qayd etilishicha, muzokaralar davomida Qosim-Jo‘mart To‘qayev Qozog‘iston va Rossiya strategik sherik va ittifoqchi ekanini, qishloq xo‘jaligi sohasida ulkan istiqbolga ega hamkorlik olib borishlarini bildirgan. Uning ta’kidlashicha, 2022-yilda qishloq xo‘jaligi mahsulotlari aylanmasi o‘sib, 3,6 milliard dollarga yetgan. Shuningdek, u Qozog‘iston va Rossiyaga dunyoda ekin maydonlarining deyarli 10 foizi, yaylov va pichanzorlarning 9 foizi to‘g‘ri kelishini ta’kidlagan.
Qozog‘iston prezidenti o‘z mamlakati YOIIning o‘g‘it bozorida Rossiya bilan raqobatlashmasligi kerak, deb hisoblaydi. U mamlakatlar oziq-ovqat xavfsizligini ta’minlash bo‘yicha sa’y-harakatlarni muvofiqlashtirish muhimligini ma’lum qildi. To‘qayev Vladimir Putinga qishloq xo‘jaligi innovatsion markazlarida ishlashni taklif qildi.
Vladimir Putin, o‘z navbatida Qozog‘iston bilan savdoda milliy valyutalardan foydalanish sezilarli darajada kengayganini qayd etgan. U Qozog‘iston bilan qishloq xo‘jaligi sohasida savdo va investitsiya almashinuvi “dinamik ravishda o‘sib borayotganini” hamda Rossiya Qozog‘istonga qishloq xo‘jaligi mahsulotlarini yetkazib berishda davom etishini ta’kidlagan.
Prezidentlar, shuningdek, yuzma-yuz va kengaytirilgan formatda — delegatsiyalar ishtirokida muloqot o‘tkazadi. Bundan tashqari, qator hujjatlarni imzolash rejalashtirilgan. Kremlning xabar berishicha, Rossiya va Qozog‘iston rahbarlari ikki tomonlama hamkorlik istiqbollari va dolzarb xalqaro muammolarni muhokama qiladi.
Rossiya prezidenti Vladimir Putin 12-oktyabr kuni Bishkekka kelgandi. Qirg‘izistonda ikki kunlik rasmiy tashrifi doirasida u MDH davlatlari rahbarlari kengashi majlisida ishtirok etgan va bir qator ikki tomonlama uchrashuvlar o‘tkazgandi.
Izoh (0)