Қозоғистон президенти Қосим-Жўмарт Тўқаев Франция президенти Эммануэль Макронга тор доирадаги конструктив муҳокама учун миннатдорлик билдирди, деб хабар бермоқда Tengrinews.
“Ниҳоятда конструктив тет-а-тет (яккама-якка) суҳбат учун миннатдорлик билдирмоқчиман. Аввал таъкидлаганимдек, Қозоғистон Франция билан ҳамкорликни давом эттириш бўйича ўз мажбуриятларига содиқ қолади. Муҳокамалардан сўнг биз келажакда ҳамкорлик қилиш учун бир қанча устувор йўналишларни, жумладан, энергия, муҳим хом ашё, қайта тикланадиган энергия, транзит, қишлоқ хўжалиги, соғлиқни сақлаш, қишлоқ хўжалиги каби соҳаларда шерикликни белгилаб олдик”, — деди Қозоғистон презденти.
Тўқаевнинг таъкидлашича, давлат раҳбарлари халқаро миқёсдаги мулоқотни мустаҳкамлаш юзасидан ҳам фикр алмашган.
“Кўриб турганимиздек, ҳамкорлигимиз кўлами жуда хилма-хил. Ушбу устувор йўналишлар рўйхатининг амалга оширилиши келгуси йилларда халқларимиз фаровонлиги йўлида эришаётган ютуқларимизни янада оширишига қатъий ишонаман. Асосий минтақавий ва глобал кун тартибини тўғри мувофиқлаштириш орқали ижобий ва барқарор ҳамкорлик муҳим экани қайд этилди.
Буларнинг барчаси биз бугун қабул қиладиган қўшма баёнотимизда ўз ифодасини топади. Бундан ташқари, мен маданий алоқалар ва гуманитар соҳадаги ҳамкорликнинг муҳимлигини таъкидламоқчиман”, — деди президент Тўқаев.
Қосим-Жўмарт Тўқаев ва Эммануэль Макрон Қозоғистонда француз маданияти ва француз тилини тарғиб қилишнинг аҳамияти ва зарурлиги ҳақида ҳам гаплашган.
“Биз ушбу муҳим соҳада ҳамкорлик қилиш учун бор куч-ғайратимизни ишга соламиз. Қозоғистон халқи учун Франция халқи, бой маданияти ҳақида кўпроқ маълумотга эга бўлиш ва француз тилини ўрганиш зарур, албатта. Қозоғистон ва Франция ўртасидаги стратегик ҳамкорлик ривожланади, деган фикрдаман.
Ўз навбатида, Қозоғистон президенти сифатида сизни ишонтириб айтмоқчиманки, биз умумий манфаатларга эга бўлган кўплаб соҳаларда алоқалар ва ҳамкорликни ривожлантириш учун барча саъй-ҳаракатларимизни ишга соламиз. Умид қиламизки, Қозоғистон келажакда Франция учун муҳим стратегик шерик бўлади”, — деди республика раҳбари.
Франция президенти расмий ташриф билан Қозоғистонда бўлиб турибди. Эртага, 2 ноябрь куни Макрон Ўзбекистонга келади.
Изоҳ (0)