Украина Олий радаси президент Владимир Зеленский томонидан киритилган мамлакатдаги ҳарбий ҳолат ва умумий сафарбарликни яна 90 кунга — 2024 йил 14 февралгача узайтириш тўғрисидаги қонун лойиҳаларини қабул қилди. Бу ҳақда Украина парламенти депутати Ярослав Железняк хабар берди.
Минимал 226 овоз талаб этилган ҳолатда 329 депутат ҳарбий ҳолатни узайтириш учун, 322 депутат эса умумий сафарбарликни давом эттириш учун овоз берган.
“Бу уруш бошланганидан бери парламентда ҳарбий ҳолат учун тўққизинчи марта овоз бериши бўлди”, — деб ёзади Железняк. Депутатнинг қўшимча қилишича, бу гал Олий рада мажлиси Украина Миллий хавфсизлик ва мудофаа кенгаши вакилларисиз ўтган.
Украинада ҳарбий ҳолат Россиянинг 2022 йил февралида мамлакатда кенг кўламли ҳарбий ҳаракатлари бошланганидан бери амалда. Ўшанда Зеленский фуқароларнинг умумий сафарбарлиги тўғрисидаги қонунни имзолаган, унга кўра, 18 ёшдан 60 ёшгача бўлган эркакларга Украина ҳудудидан чиқиб кетиш тақиқланади, аммо алоҳида ҳолатлар бундан мустасно.
Аввалроқ Украина халқ депутати Алексей Гончаренко мамлакат раҳбари Владимир Зеленский президентлик сайловларини 2024 йил 31 мартда ўтказиш тўғрисидаги қарорни маъқуллаганини маълум қилганди. Шу билан бирга у “Ишонтиришим мумкинки, ғарбий ҳамкорларимиз биздан сайловлар ўтказишни талаб қилмаяпти. Ҳеч қандай оммавий ёки нодавлат талаблар йўқ”, деган.
Изоҳ (0)