Луганскда 8 ноябрь куни “халқ кенгаши” депутати, ўзини ЛХР деб эълон қилган ҳудуд “халқ милицияси” бошқармаси собиқ бошлиғи Михаил Филипоненконинг машинаси портлатиб юборилди. Портлаш унинг уйи ёнида содир бўлган ва ҳодиса оқибатида Филипоненко ҳалок бўлган.
Филипоненконинг ўлимидан сўнг Россия Тергов қўмитаси учта модда, жумладан, терроризм бўйича жиноий иш қўзғатган.
2023 йил февраль ойида ҳам Филипоненконинг ҳаётига суиқасд уюштирилганди, ўшанда унинг машинаси “Ўт очишни тўхтатиш режимини назорат қилиш ва мувофиқлаштириш бўйича қўшма марказ” деб номланган ЛХР ваколатхонаси биноси ёнида портлатилган. Филипоненко омон қолган, бироқ унинг ҳайдовчиси жароҳатланган эди.
Украина Мудофаа вазирлигининг Бош разведка бошқармаси Михаил Филипоненкога суиқасд уюштиришга алоқадорлигини маълум қилган. Ҳарбий разведканинг Facebook аккаунтига кўра, “махсус операция”ўтказилган. Бош разведка бошқармасига кўра, Филипоненко Луганск вилоятининг эгаллаб олинган ҳудудларида ҳарбий асирлар ва гаровга олинган тинч аҳоли қийноққа солинган зиндонларни ташкил қилиш билан шуғулланган.
Аввалроқ Украина президенти Владимир Зеленский Украинанинг қарши ҳужуми ҳозирда қийинчиликларни бошдан кечираётганига қарамай, Киев бу йил ва кейинги йил ҳам ҳужумларини давом эттиришини айтганди.
Изоҳ (0)