Украина Миллий хавфсизлик ва мудофаа кенгаши котиби Алексей Данилов Россия президенти Владимир Путин босиб олинган Херсон ва Луганск вилоятларига келмагани, чунки унинг ташрифи олдиндан тайёрланиши кераклигини айтди. Кремль бунга муносабат билдирди.
“У ерга ҳеч қандай Путин ташриф буюрмаган ва бу ҳаммага маълум. Унинг қиёфадоши борган”, — деган Данилов.
У ҳақиқий Путин билан мулоқот қилиш учун 10-14 кун карантинда, алоқа қилиш учун эса маълум масофада бўлиш кераклигини айтди. Данилов Россия президенти билан хорижий вакиллар орасидаги масофа камида 18 метр бўлиши кераклигига тўхталди.
Данилов Путиннинг бир нечта қиёфадоши борлигини таъкидлади. Унинг фикрича, сиёсатчи қўрқув туфайли босиб олинган ҳудудларга ўзи келолмайди ва бу Зеленский ҳамда унинг ўртасидаги фарқдир.
“Россия президенти жисмонан у ерда йўқ эди ва бўлиши ҳам мумкин эмасди. Чунки бу содир бўладиган бўлса, камида 2-3 ҳафта олдин тайёргарлик жараёни бошланарди. У ерда узоқ вақтдан бери ҳеч қандай тайёргарлик бўлмаган”, — деди Данилов.
Кремлнинг муносабати
Россия президенти матбуот котиби Дмитрий Песков Даниловнинг Владимир Путиннинг қиёфадошига оид баёнотига жавоб қайтарди.
“Мен бу баёнотни худди сиз каби баҳолай оламан. Буни жуда ғалати деб аташ мумкин”, — деди Песков.
18 апрель куни эрталаб Кремль матбуот хизмати Владимир Путиннинг Луганск Халқ Республикаси ва Херсон вилоятига ташрифи ҳақида хабар берди.
“Мен бундай эски машиналарни — ‘Лада’ ва ‘Жигули’ни узоқ вақтдан бери кўрмаганман. Бу одамларнинг даромадлари жуда кам эканидан далолат беради”, — дея Путин сафари ҳақида гапирган.
Зеленский офиси ҳам Путиннинг ташрифига муносабат билдирган
Владимир Зеленский офиси раҳбари маслаҳатчиси Михаил Подоляк Путиннинг Украина ҳудудларига ташрифини баҳолаган.
“Путиннинг эволюцияси (деградацияси) таъсирли. Бир йил олдин дунё унинг баёнотларини кутаётган эди. У нима дейди? Нима қилади? Бугун эса дунё бефарқ”, — деди Подоляк.
Сиёсатчи дунё учун энди Россия президенти каби сиёсий субъект мавжуд эмаслигини билдирган. Подоляк Путиннинг Украинанинг босиб олинган ҳудудларига сафарини “оммавий қотиллик муаллифининг махсус саёҳати” деб таърифлаган. Россия президенти бундай ташрифни “жиноятлардан завқ олиш” учун амалга ошириши таъкидланган.
Изоҳ (0)