Luganskda 8-noyabr kuni “xalq kengashi” deputati, o‘zini LXR deb e’lon qilgan hudud “xalq militsiyasi” boshqarmasi sobiq boshlig‘i Mixail Filiponenkoning mashinasi portlatib yuborildi. Portlash uning uyi yonida sodir bo‘lgan va hodisa oqibatida Filiponenko halok bo‘lgan.
Filiponenkoning o‘limidan so‘ng Rossiya Tergov qo‘mitasi uchta modda, jumladan, terrorizm bo‘yicha jinoiy ish qo‘zg‘atgan.
2023-yil fevral oyida ham Filiponenkoning hayotiga suiqasd uyushtirilgandi, o‘shanda uning mashinasi “O‘t ochishni to‘xtatish rejimini nazorat qilish va muvofiqlashtirish bo‘yicha qo‘shma markaz” deb nomlangan LXR vakolatxonasi binosi yonida portlatilgan. Filiponenko omon qolgan, biroq uning haydovchisi jarohatlangan edi.
Ukraina Mudofaa vazirligining Bosh razvedka boshqarmasi Mixail Filiponenkoga suiqasd uyushtirishga aloqadorligini ma’lum qilgan. Harbiy razvedkaning Facebook akkauntiga ko‘ra, “maxsus operatsiya”o‘tkazilgan. Bosh razvedka boshqarmasiga ko‘ra, Filiponenko Lugansk viloyatining egallab olingan hududlarida harbiy asirlar va garovga olingan tinch aholi qiynoqqa solingan zindonlarni tashkil qilish bilan shug‘ullangan.
Avvalroq Ukraina prezidenti Vladimir Zelenskiy Ukrainaning qarshi hujumi hozirda qiyinchiliklarni boshdan kechirayotganiga qaramay, Kiyev bu yil va keyingi yil ham hujumlarini davom ettirishini aytgandi.
Izoh (0)