Кино саноатида ҳам шундай омадсизликлар бўладики, баъзида актёрлар уларга оламшумул машҳурлик келтириши мумкин бўлган ролларни рад этиб, кейинчалик афсусланишига сабаб бўлган.
Метю Макконахи (Жек, “Титаник”)
“Титаник” култ фильмининг муваффақияти барчага маълум. Кўп йиллар ўтиб “Аватар” фильмигина унинг касса рекордини янгилашга муваффақ бўлди. Аммо бир вақтлар Жеймс Кемероннинг фожиавий кема ҳалокати ҳақидаги фильмининг муваффақиятига кўпчилик ишонмаган. Бош ролларни ўйнашга таклиф қилинган баъзи актёрлар сценарийни зўрға ўқиб, фильмда қатнашишни хоҳламаган. Мисол учун, Метю Макконахига Ди Каприодан анча олдин Жек ролини ўйнаш таклиф қилинган, аммо у ролни рад этган. Кемероннинг сўзларига кўра, Макконахи ўзининг персонажи унга қизиқ эмасдек туюлгани ва ҳатто ёмон ёзилгани ҳақидаги баёнотидан кейин шунчаки мулоқотни тўхтатган. Айтганча, Гвинет Пелтроу ҳам Роуз ролини ўйнаш таклифини эътиборсиз қолдиради.
Леонардо Ди Каприо (Патрик Бейтман, “Америкалик телба”)
Маняклар ва социопатлар – бундай образлар актёрни мунтазам равишда ўзига жалб қилади. Бироқ бир марта Леонардо яна бир телба ролини ўйнаш учун Кристиан Бэйл билан рақобатлашишига тўғри келади — иккаласи ҳам шафқатсиз қотил Патрик Бейтман ролини ўйнашни хоҳларди. Якунда Бэйл ғалаба қозонади. Ҳатто у истеҳзо билан: “Леонардо психопат ролини ўйнайди? Бу роллар унинг, таъбир жоиз бўлса, “фотогеничний” юзига умуман тўғри келмайди. Аммо менинг қиёфам разил ва расво образлар учун жуда мос келади” дейди.
Жим Керри (Жек читтак, “Кариб денгизи қароқчилари”)
Жонни Депп “Кариб денгизи қароқчилари” фильмида иштирок этишдан олдин ҳам таниқли бўлса-да, капитан Жек читтак роли унга чинакамига оламшумул машҳурлик олиб келди ва айтиш керакки, фильмнинг муваффақияти асосан шу қаҳрамон образи билан таъминланган. Бироқ ҳаммаси бутунлай бошқача бўлиши мумкин эди, чунки қароқчи ролига дастлаб Жим Керри кастингдан ўтган. Аммо Жим бошқа лойиҳа — “Ҳар нарсага қодир Брюс” фильми фойдасига бу ролдан воз кечади.
Брюс Уиллис (Сем, “Руҳ”)
Ҳар қандай тўсиқларни енгиб ўтишга қодир севги ҳақидаги романтик ва ниҳоятда таъсирли ҳикоя. Бош қаҳрамонлар Деми Мур ва Патрик Суэйзи ўрнида бошқа ҳеч кимни тасаввур қилиб бўлмайди. Шунга қарамай, Суэйзи Сем ролини деярли тасодифан қўлга киритади — бу образ унга Брюс Уиллис туфайли насиб этади. Гап шундаки, Уиллис фильмда рол ўйнашдан бош тортади, чунки у фильм муваффақиятсизликка учрашига амин эди. Директорнинг бошқа иложи қолмайди, картина муваффақиятсизлик ёқасида эди. Ҳаммасини бахтли тасодиф ҳал қилади — “Руҳ” фильмининг сценарий муаллифи Брюс Жоэл Рубин Патрик Суэйзи билан бўлган интервьюни кўриб қолади ва актёр билан учрашади. Режиссёр Суэйзи бош қаҳрамон ролини ўйнашига қаттиқ қаршилик қилади, аммо ажойиб кинопробадан сўнг актёр танлаш масаласи ниҳоят ҳал бўлади.
Тим Рот (Северус Снейп, “Гарри Поттер ва ҳикматлар тоши”)
Тим Рот сеҳргар бола ҳақидаги машҳур ҳикояда профессор Северус Снейп ролига жуда мос эди. Бироқ охир-оқибат Снейп ролини Алан Рикман ўйнайди, Рот эса Бёртоннинг “Маймунлар сайёраси” фильмида иштирок этишни афзал кўради.
Эмили Уотсон (Амели, “Амели”)
Одри Тату ўрнида бошқа бировни тасаввур қилиш мумкинми? Албатта йўқ! Бироқ фильм режиссёри Жан-Пьер Жене бош ролда Эмили Уотсон ўйнашини хоҳлаган ва ҳатто бош қаҳрамонни уникига ўхшаш исм – Амели деб атаган. Аммо французнинг орзулари рўёбга чиқмади: биринчидан, Эмили француз тилини билмасди, бу режиссёрнинг вазифасини сезиларли даражада мураккаблаштирарди, иккинчидан, Эмили Уотсон “Госфорд боғи” фильмида суратга тушишга розилик берган ва уни рад этишга жуда кеч эди. Аммо бу кимлар учундир катта омад бўлди, чунки Татунинг бу роли ҳозиргача унинг ташриф қоғозига айланган.
Изоҳ (0)