Оқ уйнинг миллий хавфсизлик бўйича маслаҳатчиси Жейк Салливаннинг айтишича, Америка қўшинларининг Афғонистондан олиб чиқилиши АҚШ армиясини каттароқ қийинчиликларга тайёрлаш учун зарур бўлган.
Салливанга кўра, бу қарорни қабул қилиш афғонлар ва Америка кучлари учун қийин бўлган, аммо АҚШ ўз олдидаги муаммоларга тайёрланиши керак эди.
Унинг аниқлик киритишича, Жо Байденнинг мақсади ўз мамлакати ҳарбий кучларини Афғонистондан олиб чиқиб кетиш ва мамлакатдаги энг узоқ давом этган урушни тугатиш, Вашингтоннинг мудофаа сиёсатини ҳозирги воқеликлардан келиб чиқиб юритиш, жумладан, Россия ва Хитой каби каттароқ кучлар билан тўқнашга тайёргарлик кўриш бўлган.
“АҚШ Афғонистонда халқаро терроризмни масофадан нишонга олишни давом эттиради, аммо энди узоқ муддатли урушларда қатнашмайди”, — деди Салливан.
АҚШ ҳарбийларининг Афғонистондан олиб чиқилиши
АҚШ ҳарбий кучлари Афғонистонда 2001 йилдан бери бўлиб турганди. Мамлакатдаги миссия 2001 йил 11 сентябрдаги террорчилик ҳужумларидан сўнг бошланган. Ҳужумлар учун жавобгарликни “Ал-Қоида” ўз зиммасига олган. Тахминан, 3 минг киши Нью-Йоркдаги терактлар қурбонига айланган, ҳужумнинг асосий нишони Жаҳон савдо маркази ва Пентагон бўлган.
Террорчилик ҳужумларидан сўнг кичик Жорж Буш ҳужумларда иштирок этган террорчиларни йўқ қилишга қаратилган “Енгилмас озодлик” операциясини бошлашга буйруқ берди. Афғонистондаги уруш ушбу операциянинг асосий қисмига айланди. Пентагоннинг расмий маълумотларига кўра, 2001 йилдан 2014 йилгача расман давом этган операцияда 2 218 нафар америкалик ҳарбий ҳалок бўлган.
Ушбу статистика 2014 йил АҚШ армияси томонидан Афғонистон ҳукуматини қўллаб-қувватлаш бўйича НАТОнинг қўшма операцияси эълон қилингандан бери кўрилган зарарларни ўз ичига олмайди. Қўшма Штатлар жанговар ҳаракатларни расман тўхтатганига қарамай, Америка ҳарбийлари “Толибон” билан тўқнашувларда иштирок этишда ва террорчилар позицияларига зарба беришда давом этди.
Афғонистондан НАТО қўшинларини олиб чиқиш 2021 йил 29 апрелда бошланган, АҚШ ва “Толибон” ўртасида тузилган келишувга биноан 30 август куни Америка армияси ўз контингентини Афғонистондан олиб чиқишни якунлади.
Изоҳ (0)