Октябрь ойида Ўзбекистон бош вазири ўринбосари Жамшид Ходжаев бошчилигидаги делегация Афғонистонга ташриф буюрган эди. Унда ўзаро савдони ривожлантириш, икки давлат ўртасидаги транзит муаммоларига ечим топиш ва Кобулда Ўзбекистон товарлари кўргазмасини очиш муҳокама қилинган. Ўзбекистон транспорт вазири Илҳом Маҳкамов ташриф юзасидан изоҳ берди.
“Асосий мақсадимиз — Афғонистон орқали Покистон портларига чиқиш, трансафғон коридорини ривожлантириш.
Ташриф давомида мазкур коридордан фойдаланиш, қўшимча шароит ва қулайликлар яратиш бўйича келишувларга эришилди. Ўзбекистон ташувчилари Афғонистон ҳудудидан бемалол ўтишига, яъни Покистонгача етиб боришларига шароит яратиб бериш бўйича келишувларга эришдик”, — деди Илҳом Маҳкамов.
Аввалроқ Афғонистонда “Ўзбекистон темир йўллари” ваколатхонаси очилиши мумкин маълум қилинганди.
“Толибон” ва Ўзбекистон вазирлари нималарни муҳокама қилди?
“Толибон” Афғонистоннинг Ўзбекистон билан савдо айланмаси йилига 600 миллион доллардан 3 миллиард долларгача ошишини, Ҳайратон савдо порти фаолияти эса бундан буён 24 соат ишлашини маълум қилди.
“Толибон” ҳаракати савдо-саноат вазири Нуруддин Азизий маросимда сўзлаган нутқида Ўзбекистон делегация таркибида беш нафар ўзбекистонлик вазирнинг иштирок этиши ўзбекистонликларнинг Афғонистон билан муносабатларига хайрихоҳлиги ва кучли қизиқишини кўрсатишини айтди.
Унинг сўзларига кўра, “Толибон” Саноат ва савдо вазирлигининг транзит муаммоларини ҳал қилиш ва афғон тадбиркорларига визалар бериш бўйича таклифлари Ўзбекистон делегацияси томонидан қабул қилинган.
“Толибон” савдо-саноат вазири Ўзбекистон билан савдо ҳажмини йилига 600 миллион доллардан 3 миллиард долларга кўтариш мақсадига эришилишини ҳамда Ҳайратон порти бундан буён 24 соат очиқ бўлишини қўшимча қилди.
У Афғонистонда турли соҳаларга сармоя киритиш имкониятлари мавжудлигини айтиб, “Толибон” Ўзбекистон хусусий секторига биринчилардан бўлиб Афғонистонга сармоя киритиш ҳуқуқини беришини таъкидлаган.
Нуруддин Азизийнинг айтишича, тез орада Ўзбекистон—Афғонистон Савдо-саноат палатаси қайта очилади ва бу борада Ўзбекистон делегацияси билан музокараларга киришилган.
У Ўзбекистондан мамлакатга кимёвий ўғит олиб киришни сўради.
“Афғонистон қишлоқ хўжалиги, тоғ-кон саноати ва саноат технологияларига муҳтож, Афғонистон эса бу эҳтиёжни қондириш учун Ўзбекистон билан шартнома тузишдан манфаатдор”, — дейди “Толибон” савдо-саноат вазири.
У ўз нутқида Ўзбекистон делегациясига мурожаат қилди ҳамда икки томон ўртасидаги экспорт ва импорт даражаси ошиши учун афғон тадбиркорларига кўпроқ қулайликлар яратилишини сўради.
Ўзбекистон савдо делегацияси раҳбари, бош вазири ўринбосари Жамшид Хўжаев эса ўз нутқида Афғонистоннинг ривожланиши ва юксалиши минтақа давлатлари, жумладан, Ўзбекистон учун ҳам манфаатдор эканини таъкидлаган.
Хўжаевнинг сўзларига кўра, Ўзбекистон кончилик соҳасида етарли тажрибага эга ва Афғонистон расмийлари билан бу соҳада ҳамкорлик қилишга тайёр.
Ўзбекистон савдо делегацияси раҳбари, шунингдек, мамлакат Афғонистон сувларини бошқариш ва бу мамлакатда қишлоқ хўжалигини ривожлантиришда ҳамкорлик қилишини таъкидлаган.
Изоҳ (0)