Бош вазир ўринбосари Жамшид Хўжаев Кобул шаҳрида Афғонистон бош вазири ўринбосари Абдул Ғани Мулла Бародар билан учрашди. Бу ҳақда Интестициялар, саноат ва савдо вазирлиги матбуот хизмати хабар берди.
Қайд этилишича, учрашув чоғида бош вазир ўринбосарлари Ўзбекистон ва Афғонистон ўртасидаги икки томонлама ҳамкорликни ривожлантиришга доир қатор масалаларни муҳокама қилган. Бундан ташқари, Кобул шаҳрида Ўзбекистон ва Афғонистон вазирлик ва идоралари иштирокида кенгайтирилган учрашув бўлиб ўтган.
Шунингдек, учрашувларда Сурхон—Пули-Хумри электр узатиш тармоғи қурилиши лойиҳасини амалга ошириш, Ўзбекистоннинг Кобул ва Мозори Шариф шаҳарларидаги савдо уйлари фаолиятини қайта тиклаш ва жонлантириш, Афғонистонда “Ўзбекистон темир йўллари” АЖ ваколатхонасини очиш, халқаро юк ташиш, божхона назорати ҳамда фойдали қазилмали конларни ўрганиш ва ривожлантириш истиқболларига оид бошқа масалалар муҳокама қилинган.
Ўзбекистон делегациясининг Кобулга ташрифи доирасида Ўзбекистонда ишлаб чиқарилган миллий маҳсулотлар кўргазмаси, икки мамлакатнинг давлат идоралари ва ишбилармон доиралари вакиллари иштирокида “B2B” ҳамда “G2B” форматидаги учрашувлар ўтказилган.
Натижаларга кўра, қишлоқ хўжалиги, тўқимачилик саноати, транспорт-логистика, кимё саноати, фармацевтика, қурилиш материаллари ишлаб чиқариш, чарм-пойабзал , электротехника саноати каби соҳаларда 1 миллиард 185 миллион долларлик экспорт-импорт шартномалари ва битимлар имзоланган.
Аввалроқ “Толибон” Афғонистоннинг Ўзбекистон билан савдо айланмаси йилига 600 миллион доллардан 3 миллиард долларгача ошишини, Ҳайратон савдо порти фаолияти эса бундан буён 24 соат ишлашини маълум қилганди.
Изоҳ (0)