Дилшод Мусабеков “Дизайн”нинг концерт баннерида кўринмаётган актёрлар ва уни ҳақорат қилган мухлиси ҳақида гапирди (видео)

“Дарё”нинг YouTube’даги каналида “Дизайн” кулги жамоаси актёри Дилшод Мусабеков билан суҳбат ташкил этилди. У янги концерт баннерларида нега Элмурод Ҳақназаров, Ситора Фармонова ва Назокат кўринмаётганинг сабабларини айтиб ўтди.

— Бу масала билан боғлиқ саволларни кўп эшитяпман. “Элмуродни чиқиштирмадиларми? Назокат ва Ситора энди иштирок этмайдими?” деган саволларни кўп эшитяпман. Хавотир олишмасин, таркиб ўзгаргани йўқ. Биз машҳур “Жуманжи” асарини янгича талқинда саҳнага олиб чиқмоқчимиз. Шу боис Элмурод бошчилигидаги бошқа ижодкорлар учун алоҳида баннер тайёрланди. “Дизайн”ни кузатадиган мухлислар яхши билишади. Ҳеч бир саҳна кўриниши такрорланмайди. Яъни унинг давоми бўлиши мумкин, аммо ҳеч қачон такрор ҳазиллардан фойдаланмаймиз. “Жуманжи” ҳам бу йил янгича талқинда саҳналаштирилмоқда, — дейди Дилшод Мусабеков.

Дилшод Мусабеков санъаткорнинг ҳаётигача аралашаётган ва ижтимоий тармоқларда очиқдан очиқ ҳақорат қилаётган инсонлар ҳақида гапириб ўтди.

— Аслида ҳаммага бирдек ёқишнинг иложи йўқ. Битта концертни ҳам 100 та томошабин кўрса, ўшанда иккитасигина “ёқмади” деса, уларнинг фикрига эътибор қаратадиган бўлиб қолганмиз. Ижтимоий тармоқлардаги ҳақоратли гап-сўзлар ҳақида ҳам алоҳида гапириб ўтмасам бўлмайди. Инновацион замон дегани ўзбек эканлигини унутиб, бировнинг айбини очиб ташлаш керак дегани эмас-ку. Ҳозирги айрим кузатувчилар санъаткорнинг ижодини кузатишмаяпти. Ҳатто санъаткорларнинг шахсиятигача аралашиб, танқид қилишга уста бўлиб қолишган. Кимга эрга теггани, нима қилаётгани билан нима ишинг бор, дейдиган одам топилмаяпти.

Яқинда бир кузатувчининг ёзган гапидан дилим оғриди. Укам авиация соҳасида ишлайди. Бир неча йил ўқиган, тажрибали мутахассис. У оммага ўзини кўрсатишни истамайдиган йигит. Ундан фахрланиб, Самарқанд аэропорти ҳақида тайёрлаган видеосини ижтимоий тармоққа жойласам, биттаси “икковинг ҳам ҳаромисанлар”, деб ёзди. Мен юзтадан биттасини мисол келтириб айтяпман. Биз фалон-фалончиевнинг болалари эмасмиз. Оддий ошпаз Комил аканинг ўғилларимиз. Укам ҳам, мен ҳам бугунги кунгача фақат меҳнат орқали эришганмиз. Буни билмай туриб, шахсиятга тегиш қанчалик тўғри. Тўғри, бунда санъаткорларнинг айби ҳам бор. Ижтимоий тармоқлар фаоллашганидан кейин мухлис ва санъаткор ўртасидаги чегара бузилди, — дейди Дилшод Мусабеков.

Видеони тўлиқ ҳолда қуйида томоша қилишингиз мумкин.