“Халқлар дўстлиги”да бўш кун йўқ, директори эгаллаб олган”. Муножот Йўлчиева концерт беролмаётгани ва муаллифлик ҳуқуқи ишламаётганидан нолиди

Ўзбекистон халқ артисти Муножот Йўлчиева Маданият вазирлиги томонидан ўтказилган давра суҳбатида кўп гаплар оғизда қолиб кетаётгани, концерт бериш учун “Халқлар дўстлиги” санъат саройида кун ололмагани ҳақида куйиниб гапирди.

— Боғча ёшидан бошлаб болаларга мумтоз қўшиқларни тушунтиришимиз керак, деб кўп гапирдик. Ҳатто бунинг учун маблағлар ҳам ажратилди. У иш давом этаяптими, йўқми? Боғча тарбияланувчилари тугул, катта одамлар ҳам ҳар куни маъносиз қўшиқни эшица, беихтиёр уни айта бошлайди. Боғчаларга “жикир-жикир” маъносиз қўшиқларни эмас, халқ қўшиқлари ёки мақом ашулаларини қўйиб қўйишса, маънавий дид шаклланиб боради.

Кейин муаллифлик ҳуқуқини тиклаш борасида ҳам кўп гапирдик. Минг афсуски, ҳозирги тўйларда умуман қўшиқ айтишни билмайдиган, драма театри актрисалари Юлдуз Усмонова ёки Зулайҳо Бойҳонованинг қўшиқларини айтиб, нон еяпти. Топган даромадидан муаллифга беш сўм пул ҳам бермайди. “Ялла” ансамблининг қўшиқларини айтиб, кошона уйда яшаётганлар йўқ деб ўйлайсизми? Суриштириб борсак, ўшаларнинг ҳеч бири “Сизнинг қўшиғингиз билан тирикчилик қиляпман”, деб 100 АҚШ доллари бериб, розилик ҳам сўрамаган. Қонун чиқариляпти, аммо унинг бажарилаётганини ҳам назоратга олиш керак.

Катта саҳналардаги концертларга таклиф этишади. Битта концертга 20 тадан ортиқ санъаткорни таклиф этишади. Кейин ҳаммага вақт етиши керак деб қўшиқнинг у еридан, бу еридан кесиб ташлашади. Мен розиман, бундай концертларга таклиф этишмасин. Аммо 10 та санъаткор 5-10 дақиқа давом этадиган қўшиғини тўлиқ ижро эцин ва бундан тингловчи ҳам завқлансин. Ўзбекистон кунлари муносабати билан Тожикистонга борганимизда улар “Сароҳбори оромижон” ашуласини 8 дақиқа давомида ижро этишди. Томошабинлар ҳам маза қилиб тинглашди. Бизда эса ашуланинг у еридан, бу еридан кесиб, унинг устига фонограммада айтилиши уят эмасми?!

Мен “Халқлар дўстлиги” санъат саройида концерт бераман, деб борсам бўш кун йўқ, дейишди. Ҳамма эгаллаб бўлган. Мен ҳам пул ишлашни, концерт беришни хоҳлайман. Ўн кунлаб концерт беришга менинг ҳам кучим етади. Аммо сарой директори ёки ҳокимиятдагилар эгаллаб олишган. Улар билан мен бориб, уришиб келишим керакми, сизлар назоратга олинглар. Ёки санъатдан кетишимиз ёки уни ривожлантиришимиз керак, — дейди Муножот Йўлчиева.