“Кимдир жамоани тарк этса, ‘Дизайн’ни тарқатамиз” — Дилшод Мусабеков якка концерт бермаслиги ва жамоанинг ўзгармас қоидаси ҳақида (видео)

“Дизайн” кулги жамоаси аъзоси Дилшод Мусабеков “Дарё” мухбири Наргизахон Муродовага берган интервьюсида яккахон концерт бермаслигининг сабаби ва гуруҳ аъзоларидан бири жамоани тарк этса қандай йўл тутиши ҳақида айтиб ўтди.

— Ҳар бир инсоннинг ўз қаричи бўлади. Мен Дилшод Мусабеков эмас, “Дизайн” жамоаси аъзоси сифатида танилганман. Шундай экан, жамоа билан ижод бошладимми, унинг якуни ҳам шундай бўлади. Бу билан якка ижод қилолмайман демоқчи эмасман. Ижодимга бефарқ бўлмаган инсонлар саҳнада якка чиқиш қила олишимни яхши билишади, — дейди Дилшод Мусабеков.

Кулги жамоалари орасида таркиб ўзгариши, собиқ иштирокчиларнинг яккахон тарзда ижод қилиши одатий ҳолга айланиб қолди. Фақатгина “Дизайн” жамоасида бундай янгиланиш бўлгани йўқ. Хўш, агар жамоа аъзоларидан бири якка ижод қилишни истаса, бу бошқаларга қандай таъсир этади?

— Аввалдан бизда битта қоида бор. Агар жамоа аъзоларидан бири гуруҳни тарк этса, ўша куни “Дизайн” жамоасининг фаолияти тўхтатилади. Чунки битта иштирокчининг жамоани тарк этиши “Қандайдир низоли вазият юзага келган”, деган шов-шувли миш-мишларнинг тарқалишига сабаб бўлади. Хайрлашиб, турли сабабларни тушунтиргандан кўра фаолиятимизни тўхтатганимиз яхшироқ, — дейди “Дизайн” жамоаси аъзоси Дилшод Мусабеков.