Анвар Санаевнинг “Оҳ, севгилим” ва “Тор кўча” клиплари орқали томошабинларга таниш бўлган Ботир Мўминов айни кунларда нималар билан банд? Нега у экранларда кўринмай қолган?
— Ҳозирги Ўзбекистон давлат санъат ва маданият институтининг Телевидение режиссёрлиги бўлимида таҳсил олганман. Болаликдан экранда кўринишни орзу қилганман. У пайтлари катта ҳажмдаги видеокамералар бўларди. Ота-онамдан шундай камера олиб беришларини илтимос қилганман. Селфи видеоларни суратга олишни ўша вақтда бошлаган эканман. Менда санъат борасида ҳеч қандай тасаввур бўлмаган. “Қайси институтда ўқисам, телевизорга олиб чиқишади”, деб сўраганимда санъат олийгоҳида ўқишимни тавсия қилишган. Институтга кирган кунимоқ телевидениега келиб, машҳурларнинг келишини пойлардим. Кўпчиликдан рад жавобини олганман, фақатгина Бурҳон Шаропов санъат институтида ўқишимни билиб, ёрдам беришга қарор қилган. Унинг ёрдами билан “Салом ёшлар” ва “7 дан 70 гача” кўрсатувларида бошловчилик қилганман. Устозим Анвар Санаев билан танишганимда ҳам талаба эдим, — дейди Ботир Мўминов.
У Анвар Санаев билан қилинган ҳамкорлик муваффақиятли кечгани ва унга машҳурлик келтирганини сўзлаб берди.
— Клиплар ҳам оммалашиб, кўчада юролмай қолган кунларим бўлган. Айниқса, вилоятларга борганда, хонандага бўлган эътибор қандай бўлса, мендан ҳам келиб дастхат сўрашарди. Андижондаги стадионда концерт берилётганда жуда қизиқ воқеа содир бўлган. Анвар ака “Саҳнага таклиф этсам чиқасанми?”, деб сўраган. Мен клипда рол ижро этган бўлсам, одамлар қандай кутиб олишаркан, деб ҳайрон бўлганман. Аммо реакция шу қадар кучли бўлганки, ҳайрон қолганмиз. Устозимнинг нафақат клипларида суратга тушганман, балки уларнинг кўпчилигига режиссёрлик ҳам қилганман, — дейди Ботир Мўминов.
Ботир Мўминов айни кунларда нималар билан банд, нега экранларда кўринмай қолди? Актёр бу саволга қуйидагича жавоб берди.
— Очиғини айтсам, режиссёрлар сизга рол бор дейишади-ю, жиддий таклиф беришмайди. Ҳаммаси гап-да. Агар жиддий таклифлар бўлса, албатта, рол ижро этган бўлардим. Шу боис бор эътиборимни клип ва концерт режиссёрлигига қаратганман. Бир муддат қозоғистонлик режиссёрлар билан ҳам ишладим. Туркиядаги лойиҳаларда ҳам иштирок этдим. Ҳозирги кунда клиплардан ташқари, реклама роликлари ҳам суратга оляпман, — дейди Ботир Мўминов.
Изоҳ (0)