Тошкент вилояти ҳокими Зоир Мирзаевнинг қабулида бўлган фуқаро вилоятдаги заводларнинг бирида ишга олишда коррупцияга йўл қўйилаётгани ҳақида гапириб, “40 миллион сўмдан ишга оляпти”, деди. Вилоят ҳокими бунга жавобан “Ушлаб олдингизми? (пора бераётганини дейилмоқда — таҳририят изоҳи) Олган пайтини кўрганмидингиз, пулни қаерга тўлади? Шуни ёзиб беринг, прокурорга зўр иш экан, ўзим бошида туриб, қаматтираман, шуни ёзиб беринг”, деди. Бу ҳақда Тошкент вилояти ҳокимининг Ўрта Чирчиқ туманида бўлиб ўтган сайёр қабулида сўз борди.
Зоир Мирзаевнинг қабулида бўлган аёл 29 ёшли ўғли заводдан ноҳақ ишдан бўшатилганини айтиб, иши судда кўрилаётганини, ўғли бир неча ойдан бери ишга тикланиш учун судма-суд юрганини айтди. Шунингдек, ўзининг ҳам яшаш тарзи ёмонлигини, моддий ёрдамга муҳтожлигини билдирди.
Коррупцияни ёзиб беринг, яхши айтдингиз. Отини ёзинг, ким берди, ким олди, шуларни ёзиб беринг, — деди вилоят ҳокими.
Зоир Мирзаевнинг бундай талаб қўйишини кутмаган фуқаро бу ҳақда одамлардан эшитганини, аммо ўзи гувоҳ бўлмаганини айтиб, “Кўринадиган бўлса, улар аллақачон ушланар эди-ю”, деди. Бу гапдан сўнг Зоир Мирзаев унга “Бўлмаса гапирманг-да, бировнинг эрига, боласига туҳмат қилманг-да”, — деди.
Вилоят ҳокими қабулида бўлган фуқаро мулоқот давомида мақсадига ўтиб, моддий ёрдамга муҳтожлигини, уйи йўқлигини, турмуш ўртоғи вафот этганини айтиб, моддий ёрдам сўради.
Мурожаатга жавоб берган Зоир Мирзаев мурожаатчининг оилавий аҳволи, унга бунга қадар ҳам қандайдир ёрдам берилган ёки берилмаганини ўрганиш мақсадида депутатлар иштирокида ўрганиш олиб борилишини, хулосага кўра мурожаатчига ёрдам берилишини айтди.
Изоҳ (0)