Тошкент вилояти ҳокими Зоир Мирзаев телевизорда кўриниш бериб, ажрашиб кетган турмуш ўртоғидан қизининг тўйида кўриниш бериб, дуо қилишини сўраган муштипар аёлга тўёна улашди. Бу ҳақда вилоят ҳокимининг шахсий Telegram каналида маълум қилинди.
Ижтимоий тармоқларда тарқалган бу видео эр-хотин ўртасидаги ажримлар ва оилавий низоларнинг олдини олиш қанчалар муқаддас вазифа эканлигига эътибор қаратади. Бугун пахта ҳосилининг йиғим-терими мавсуми авжида. Замира опа ҳам шу инсонлар қаторида Ўрта Чирчиқ туманига келиб, теримда иштирок этаётган экан.
Видеони кўриб, сизнинг юрагингиздан қандай туғёнлар кечган бўлса, мен ҳам шундай қаттиқ таъсирландим. Излаб кўрсак, Ўрта Чирчиққа Сурхондарёдан келиб, теримда фаол қатнашаётган Замира опа Шайманова экан.
Афсуски, Замира опанинг оиласи уч йил бурун дарз кетган. Эри уйдан чиқиб кетгани бўйича қайтмаган. Йилда бир-икки марта қишлоққа келиб, кўчада ўғилларини кўриб, қайтиб кетар, бундан қизининг дили қаттиқ оғрир экан. Яқинда тўй. Қизнинг кўзлари эса отасининг йўлига муштоқ.
Умид қиламанки, бу воқеа ўша инсонга ҳам сабоқ бўлади ва оиласи бағрига қайтади. Биз бу ҳолатни назоратга олдик, хотин-қизлар ва оила институтлари орқали қўлимиздан келган барча ишни қиламиз.
Энг катта ниятим — эр-хотин биргаликда қиз узатиб, элга тўй беришганида биз ҳам хизмат қилиб, уйларида меҳмон бўлиб, ёшларга бахт тилашимиз насиб қилсин. Ишонаманки, худди шундай бўлади, биз шунга ҳаракат қиламиз.
Инсонни қадрлаш, унга ҳурмат-иззат кўрсатиш, қийналган пайтларида ёнида туриб, ёрдам кўрсатиш бугун давлат сиёсатидир. Биз халқимиз кутган мана шу буюк сиёсатнинг оддий бир ижрочисимиз, холос, — дейди Тошкент вилояти ҳокими жамоатчиликка бу ҳақда маълум қилар экан.
Тошкент вилояти ҳокимининг вакили сифатида Замира опа билан кўришган Ўрта Чирчиқ тумани ҳокими Ихтиёр Қосимов тўёна Сурхондарё вилоятигача олиб бориб берилишини маълум қилган.
Ҳақиқатан ҳам, ҳаммани уйғотиб юбордингиз, — дейди Ўрта Чирчиқ тумани ҳокими опанинг қай тарзда телевизорга чиққанини эшитар экан.
Изоҳ (0)