Эрон Ислом инқилоби қўриқчилари корпуси Ямандаги ҳусийларга жанубдан Исроилга ҳужум қилиб, яҳудий давлатига қарши янги фронт очишни буюрди. Бу ҳақда Bild таҳлилчиси Юлиан Рёпке хабар берди.
31 октябрь куни Яман пойтахти ва мамлакатнинг ярмидан кўпини бошқараётган ҳусийлар Исроилга уруш эълон қилди. Шундан сўнг Яман режими вакиллари Исроил томон ўнга яқин баллистик ракета ва дронлар учирди.
“Исроилнинг Қизил денгиз соҳилидаги Эйлат шаҳрига етиб бориш ўрнига, ракеталар Миср ва Иордания ҳудудига тушди, баъзи снарядлар ҳам очиқ денгизга тушган бўлиши мумкин”, — дейди таҳлилчи.
Яманлик ҳусийлар томонидан эълон қилинган беш дақиқалик видеода улар Эронда ишлаб чиқарилган машҳур қуроллар: “Зулфиқор” баллистик ракеталари, шунингдек, “Қудс-3” ва “Қудс-4” қанотли ракеталаридан фойдалангани кўрсатилган. Эйлатга етиб бориш учун улар 1600 километр масофани босиб ўтиши керак эди.
2014 йилдан буён мамлакатда ҳокимиятни амалда ушлаб турган Яман ҳусийлари урушга кириши билан Исроил энди бирданига учта Эрон прокси кучлари томонидан ҳужумга учради: ҳусийлардан ташқари, булар Ливандаги “Ҳизбуллоҳ” ва Суриядаги “Исломий қаршилик”дир.
“Яманнинг Исроилга уруш эълон қилишини Эрон режимининг Яқин Шарқдаги можарони кучайтириш ва бутун минтақа бўйлаб тарқалган ресурсларини жангга жалб қилиш йўлидаги навбатдаги қадами сифатида талқин қилиш мумкин. Шу сабабли Теҳрон Исроил ва АҚШ билан тўғридан-тўғри қарама-қаршиликка яқинлашмоқда”, — дея хулоса қилади Юлиан Рёпке.
Изоҳ (0)