Исроил армияси Ғазо шаҳрига кирганини эълон қилди (харита)

Исроил мудофаа кучлари бош штаби бошлиғи Герзи Ҳалеви Исроил ҳарбийлари Ғазо шаҳрига кирганини эълон қилди. Бу ҳақда The Times оf Israel хабар берди.

“Биз урушнинг яна бир муҳим босқичига ўтдик. Бизнинг кучларимиз Ғазо шимолининг қоқ марказида бўлиб, Ғазо шаҳрини ўраб олиб, муваффақиятга эришмоқда”, — деди Ҳалеви.

Унинг таъкидлашича, қўшинлар профессионал жанговарлик ва жасоратни талаб қиладиган зич ва мураккаб шаҳар шароитида жанг қилмоқда. Ҳалеви Ғазо секторида қуруқликдаги операция бошланганидан бери 18 нафар исроиллик аскар ҳалок бўлганини айтди.

Ўз навбатида, Исроил бош вазири Биньямин Нетаньяху Исроил қўшинлари Ғазо шаҳри чеккасидан ўтганини айтган.

“Биз жангнинг энг юқори чўққисида турибмиз. Ажойиб муваффақиятга эришдик ва Ғазо шаҳрининг чеккаларидан ўтдик. Олдинга силжияпмиз”, — деган Нетаняху.

Reuters агентлигига кўра, Исроил қўшинлари ва танклари 2 ноябрь куни Ғазо шаҳри томон олдинга силжиган, бироқ Исроил армиясига миномётлардан ўқ узган ҲАМАС жангариларининг қаршиликларига дуч келган.