Эрдўғон туркий давлатлар учун ягона алифбо жорий этишни таклиф қилди

Туркия президенти Ражаб Тоййиб Эрдўғон туркий давлатлар учун ягона алифбо яратишни таклиф қилди. Бу ҳақда Tengrinews хабар берди.

Эрдўғон Туркий давлатлар ташкилотининг Остонадаги саммитидаги нутқида тегишли таклифни илгари сурган.

 “Тилимиз, маданиятимиз ва тарихимиз асосида инсоний муносабатларимизни мустаҳкамлаш учун олий таълим соҳасидаги ҳамкорликни мустаҳкамлаш борасидаги саъй-ҳаракатларимизни давом эттирмоқдамиз. Албатта, бирлигимизни мустаҳкамлашда тил жуда муҳим.

Ягона алифбо ҳам муҳим таркибий қисм бўлиб, бунда президентларнинг қўллаб-қувватлаши муҳим. Олий таълим кенгаши томонидан ташкилотимиз котибиятига билдирилган таклиф, ишончим комилки, ташкилотимиз томонидан кўриб чиқилади”, — деди Туркия президенти.

Эслатиб ўтамиз, Остонада Туркий давлатлар ташкилотининг саммити бўлиб ўтди. Саммитда Озарбайжон, Қирғизистон, Туркия, Ўзбекистон давлат раҳбарлари, шунингдек, кузатувчи давлатлар — Венгрия ва Туркманистон раҳбарлари иштирок этди.