Қозоғистон Фаластинга 1 миллион долларлик гуманитар ёрдам жўнатади. Бу ҳақда 3 ноябрь куни Остона шаҳрида бўлиб ўтган Туркий давлатлар ташкилотининг (ТDT) Х саммитида сўзга чиққан республика президенти Қосим-Жўмарт Тўқаев маълум қилди.
“Атрофимизда ҳозир оғир вазият мавжуд. Шимолда Россия ва Украина ўртасида, Яқин Шарқда эса Исроил ва Фаластин ўртасида можаро давом этмоқда. Афғонистонда беқарорлик ҳукм сурмоқда. Ғарбда ноқонуний миграция муаммоси тобора кучайиб бормоқда.
Бугун Ғазо секторидаги тинч аҳоли, айниқса, болалар ва қариялар қарама-қаршилик қурбонига айланмоқда. Асосий вазифа — уларнинг хавфсизлигини таъминлаш. Шу муносабат билан мен Фаластин халқига бир миллион доллар миқдорида гуманитар ёрдам кўрсатишга қарор қилдим”, — деди Тўқаев.
Давлат раҳбари “ўнлаб йиллар давомида ҳал этилмаган шошилинч муаммоларни” зўравонлик ва террорчилик ҳаракатлари орқали ҳал қилишни мутлақо номақбул деб атади.
“Қозоғистон бундай усулларни кескин қоралайди. Вазиятнинг кучайиши жиддий оқибатларга олиб келиши мумкин.
Шу муносабат билан биз ҳар қандай низоларни фақат тинч музокаралар ва дипломатик мулоқот орқали ҳал қилишга чақирамиз. Биз учун барча давлатларнинг ҳудудий яхлитлигини сақлаш, уларнинг ички ишларига аралашмаслик асосий устувор вазифалардир”, — деб таъкидлади Қозоғистон президенти.
Тўқаев Бирлашган Миллатлар Ташкилоти Хавфсизлик Кенгаши резолюцияларини қатъий бажариш ва халқаро ҳуқуқ нормаларига риоя қилишга чақирди.
Аввалроқ Фаластин халқига гуманитар ёрдам кўрсатиш учун Ўзбекистон томонидан 1,5 миллион АҚШ доллари ажратилиши хабар берилганди.
Изоҳ (0)