Шавкат Мирзиёев 3 ноябрь куни Остонада бўлиб ўтаётган Туркий давлатлар ташкилоти саммитида ташкилотга аъзо давлатлар ўртасидаги алоқаларни янада кенгайтиришга қаратилга қатор таклиф ва ташаббусларни илгари сурди.
Хусусан, туркий халқлар бирдамлигини, уларнинг буюк ўтмиши ва бой маданиятини, азалий қадриятларини ифода этадиган Туркий дунё хартиясини ишлаб чиқишни таклиф қилди.
“Ташкилот доирасида ўзаро ҳурмат, ишонч ва очиқлик тамойилларини мустаҳкамлаш, биргаликда турли тўсиқларни самарали енгиб ўтиш бош мақсадимиздир. Шу муносабат билан Туркий халқлар бирдамлигини, уларнинг буюк ўтмиши ва бой маданиятини, азалий қадриятларини ифода этадиган Туркий дунё хартиясини ишлаб чиқиш зарур, деб ҳисоблайман. Ушбу ўзига хос рамзий қомусни соҳанинг етук олимлари ва экспертлар иштирокида тайёрлашни таклиф қиламан.”, — деди президент.
Президент шу кунларда Туркий инвестиция фонди ўз ишини бошлашини, давлатлар ўртасида саноат кооперациясини кучайтириш ва йирик сармоявий лойиҳаларни амалга ошириш мақсадида кейинги босқичда Туркий тараққиёт банкини ташкил этиш ишларини ҳам фаоллаштириш кераклигини айтди. Давлат раҳбари ушбу молия муассасасини Тошкентда жойлаштиришга тайёрлигини билдирди.
Шунингдек, темирйўл идоралари кенгашини таъсис этишни ва бу тузилманинг дирексиясини Ўзбекистонда жойлаштиришни ҳам таклиф этди.
“Давлатларимиз темирйўл идоралари кенгашини таъсис этишни ва бу тузилманинг дирексиясини юртимизда жойлаштиришни таклиф этамиз”, — деди Шавкат Мирзиёев.
Унинг таъкидлашича, глобал логистика занжирлари ва транспорт йўлакларини ривожлантириш ва диверсификация қилиш, ягона транзит тармоғини шакллантириш масалалари долзарб аҳамиятга эга.
Давлат раҳбари юк ташувларига ўсиб бораётган талабни қондириш мақсадида Ўзбекистон Ўрта коридор салоҳиятини кенгайтириш чораларини қўллаб-қувватлашини, шунингдек, қўшимча кўптармоқли йўналишларни, жумладан, Хитой, Жанубий Осиё ва Европа бозорларига туркий мамлакатлар орқали ўтадиган коридорларни ривожлантириш ҳамда транспорт хизматларини рақамлаштириш тарафдори эканини айтди.
Шавкат Мирзиёев экология соҳасида ҳамкорликни мустаҳкамлаш мақсадида вазирлар даражасида доимий фаолият кўрсатадиган Туркий экология форумини тузиш ташаббуси ҳам илгари сурди.
“Вазирлар даражасида доимий фаолият кўрсатадиган Туркий экология форумининг тузилиши бу йўлда муҳим қадам бўлиши шубҳасиз. Бундай таъсирчан механизм ташкилотимиз фаолияти самарадорлигини оширишга қаратилган режаларимизга мосдир”, — деди президент.
Шавкат Мирзиёев жадидлар ибратли фаолияти, илмий-ижодий меросини чуқур ўрганиш юзасидан амалга оширилаётган ишларни янги босқичга кўтаришга чақирди. Президент жадидларнинг миллий ўзлиги ва давлатчилик ғояларини муҳокама қилишга бағишланган халқаро анжуманга Туркий давлатлар ташкилоти вакилларини таклиф қилди.
Ўзбекистон президенти саммитда қабул қилинаётган муҳим ҳужжатлар ва қарорлар, жумладан, саммит декларацияси ҳамда Остона акти мамлакатларнинг ёрқин туркий келажак сари навбатдаги дадил қадамлари бўлишига ишонишини таъкидлади.
Изоҳ (0)