“Вагнер” хусусий ҳарбий компанияси Россияда ишлаб чиқарилган “Панцир-С1” зенит-ракета ва қурол тизимини (НАТО таснифига кўра Са-22) Ливаннинг “Ҳизбуллоҳ” гуруҳига топшириши мумкин. Тегишли маълумотлар АҚШ разведкасига келиб тушди, деб хабар бермоқда The Wall Street Journal манбаларга таяниб.
Америка расмийларидан бирининг сўзларига кўра, АҚШ ҳукумати “Вагнер” зенит тизимини “Ҳизбуллоҳ”га топширганини тасдиқлай олмади. Вашингтон бу ҳақидаги хабарларни кузатишда давом этмоқда, манбаларга кўра, эҳтимолий жўнатма жиддий ташвиш уйғотган.
Аввалроқ АҚШ “Ҳизбуллоҳ”нинг Исроил шимолига ҳужум уюштиришига йўл қўймаслик учун Шарқий Ўрта Ер денгизига самолёт ташувчи кемасини жойлаштирганди.
“Вагнер” ёлланма аскарлари Сурияда “Ҳизбуллоҳ” жангарилари каби фаолият юритмоқда, деб ёзади The Wall Street Journal. Reuters хабарига кўра, Сурия ҳукумати 2023 йил июнь ойида Евгений Пригожин исёни пайтида Сурияда бўлиб турган “вагнерчи”ларни Россия Мудофаа вазирлиги билан шартнома имзолашга мажбурлаш операциясини ўтказган.
Изоҳ (0)