Пентагон Украинага мўлжалланган ўн минглаб 155 миллиметрли снарядларни Исроилга топширишни режалаштирмоқда. Бу ҳақда вазиятдан хабардор уч нафар исроиллик расмийга таяниб, Axios нашри ёзди.
Нашр маълумотларига кўра, Исроил мудофаа қўшинлари ва мамлакат Мудофаа вазирлиги Вашингтонга Ғазода қуруқликдаги операцияга, Ливан билан чегарада эса “Ҳизбуллоҳ”га қарши эҳтимолий жангга тайёргарлик кўриш учун зудлик билан артиллерия снарядларига муҳтожлигини билдирган.
Америка расмийлар Украина учун мўлжалланган снарядларнинг Исроилга узатилиши Украинанинг рус қўшинларига қарши курашиш қобилиятига бевосита таъсир қилмаслигини айтди.
Нашр шунингдек, Украина учун мўлжалланган ўқ-дорилар Исроилда мамлакатлар ўртасидаги келишув доирасида сақланаётган Америка қуроллари захирасининг бир қисми бўлганини таъкидлайди.
Исроил мудофаа вазири Ёав Галант аввалроқ Исроил қўшинлари Ғазо секторида қуруқликдан операция бошлашини айтганди. The Times оf Israel нашрининг ёзишича, вазир бу ҳақда Исроил ҳарбийларининг Ғазо сектори чегарасидаги позицияларига ташрифи чоғида эълон қилган.
АҚШ президенти Жо Байден CBS телеканалига берган интервьюсида Вашингтон Исроилга ҳам, Украинага ҳам ёрдам кўрсатиш имкониятига эга эканлигини айтди.
“Ахир биз Америка Қўшма Штатларимиз. Биз иккаласига ҳам ғамхўрлик қилишга ва шу билан бирга халқаро мудофаани сақлаб қолишга қодирмиз”, — деган АҚШ президенти.
Изоҳ (0)