1 ноябрь куни Миср бош вазири Мустафо Мадбули Синай яриморолининг шимоли-шарқида, Ғазо сектори билан чегарада жойлашган Ал-Ариш шаҳрига ташриф буюрди. Сиёсатчи ҳудуддаги араб қабилалари етакчилари билан учрашиб, расмий Қоҳира ҳеч қачон Ғазо сектори аҳолисининг Синай яриморолига кўчирилишига рози бўлмаслигини айтиб ўтди.
Медбулининг қайд этишича, Синай бутун Миср халқи учун алоҳида аҳамият ва қадриятга эга.
“Биз Синай оролидаги ҳар бир қум зарраси учун миллионлаб одамлар ҳаётини қурбон қилишга тайёрмиз. Минтақавий муаммоларни бизга қарши ҳал этилишига йўл қўймаймиз”, – деган бош вазир.
Мустафо Мадбули Исроил томонидан Ғазо секторидаги тинч аҳолига нисбатан қўлланилаётган ҳаракатларга қарши эканлигини ва бу инқирозни ҳал қилиш учун ҳаракат қилаётганини қўшимча қилган.
Маълумотларга кўра, маҳаллий ОАВ 13 октябрь куни Исроил разведкаси томонидан тайёрланган ҳужжатни қўлга киритган. Ҳужжатга кўра, Исроил Мисрга Ғазо секторидаги 2,3 миллион аҳолини Синай яриморолига кўчиришни таклиф қилган. Ушбу ҳужжат Фаластин маъмурияти ва кўплаб араб давлатларида норозилик уйғотмоқда.
Эслатиб ўтамиз, кеча Ғазо сектори ва Миср ўртасидаги Рафаҳ назорат-ўтказиш пункти чекланган эвакуация учун очилди.
Рафаҳ — Ғазо аҳолисига гуманитар ёрдам кўрсатиш учун очилган ягона назорат-ўтказиш пункти. 31 октябрда Миср назорат пунктига танклар ва бошқа зирҳли техникаларни жойлаштирди. Бунгача Қоҳира узоқ вақтдан бери сектордан фаластинлик қочқинларни қабул қилишдан бош тортган эди.
Сўнгги маълумотларга кўра, Ғазо секторида Исроил зарбалари оқибатида ҳалок бўлганлар сони 8 796 кишини ташкил этади, 22 мингдан ортиқ киши жароҳат олган. Исроилда эса ҲАМАС зарбаларидан 1,4 мингдан ортиқ одам ҳалок бўлди, 5,4 минг киши жароҳатланди.
Изоҳ (0)