1-noyabr kuni Misr bosh vaziri Mustafo Madbuli Sinay yarimorolining shimoli-sharqida, G‘azo sektori bilan chegarada joylashgan Al-Arish shahriga tashrif buyurdi. Siyosatchi hududdagi arab qabilalari yetakchilari bilan uchrashib, rasmiy Qohira hech qachon G‘azo sektori aholisining Sinay yarimoroliga ko‘chirilishiga rozi bo‘lmasligini aytib o‘tdi.
Medbulining qayd etishicha, Sinay butun Misr xalqi uchun alohida ahamiyat va qadriyatga ega.
“Biz Sinay orolidagi har bir qum zarrasi uchun millionlab odamlar hayotini qurbon qilishga tayyormiz. Mintaqaviy muammolarni bizga qarshi hal etilishiga yo‘l qo‘ymaymiz”, – degan bosh vazir.
Mustafo Madbuli Isroil tomonidan G‘azo sektoridagi tinch aholiga nisbatan qo‘llanilayotgan harakatlarga qarshi ekanligini va bu inqirozni hal qilish uchun harakat qilayotganini qo‘shimcha qilgan.
Ma‘lumotlarga ko‘ra, mahalliy OAV 13-oktyabr kuni Isroil razvedkasi tomonidan tayyorlangan hujjatni qo‘lga kiritgan. Hujjatga ko‘ra, Isroil Misrga G‘azo sektoridagi 2,3 million aholini Sinay yarimoroliga ko‘chirishni taklif qilgan. Ushbu hujjat Falastin maʼmuriyati va ko‘plab arab davlatlarida norozilik uyg‘otmoqda.
Eslatib o’tamiz, kecha G‘azo sektori va Misr o‘rtasidagi Rafah nazorat-o‘tkazish punkti cheklangan evakuatsiya uchun ochildi.
Rafah — G‘azo aholisiga gumanitar yordam ko‘rsatish uchun ochilgan yagona nazorat-o‘tkazish punkti. 31-oktyabrda Misr nazorat punktiga tanklar va boshqa zirhli texnikalarni joylashtirdi. Bungacha Qohira uzoq vaqtdan beri sektordan falastinlik qochqinlarni qabul qilishdan bosh tortgan edi.
So‘nggi ma’lumotlarga ko‘ra, G‘azo sektorida Isroil zarbalari oqibatida halok bo‘lganlar soni 8 796 kishini tashkil etadi, 22 mingdan ortiq kishi jarohat olgan. Isroilda esa HAMAS zarbalaridan 1,4 mingdan ortiq odam halok bo‘ldi, 5,4 ming kishi jarohatlandi.
Izoh (0)