Украинанинг коррупцияни бартараф қилиш миллий агентлигининг баёнотига кўра, Швейцариянинг Nestle компанияси Россияга маҳсулот етказиб беришда давом этмоқда ва у ердаги озиқ-овқат ишлаб чиқариш базасини кенгайтирмоқда.
Швейцариянинг Nestle корпорацияси дунёдаги энг йирик озиқ-овқат ишлаб чиқарувчилардан бири бўлиб, у 187 мамлакатда фаолият юритади.
“Россиянинг Украинага нисбатан агрессиясига қарамай, компания Россия Федерациясида ўз фаолиятини давом эттирмоқда. Nestle тажовузкорга маҳсулот етказиб бермоқда ва Россияда ишлаб чиқаришни кенгайтирмоқда”, — дейилади агентлик баёнотида.
Компания Россия бозорида кам даромад топишига қармай, бу бозорни тарк этмаслигини билдирган. Компания бу қарорини мамлакат аҳолисини зарур маҳсулотлар билан таъминлаш ва россиялик ходимларига ғамхўрлик қилиш билан изоҳлаган. Маълумотларга кўра, Россияда Nestle компаниясининг камида еттита заводи бор, уларда 7000 дан ортиқ ишчи ишлайди.
Қайд этилишича, Nestle компанияси 2022 йилда Россияга 374 миллион долларлик ярим тайёр маҳсулот ва хом ашё импорт қилган. 2023 йилнинг тўққиз ойлик ҳисоб-китобларига кўра, бу кўрсаткич 271 миллион долларни ташкил қилади.
Шу билан бирга, Nestle компанияси Украинада ҳам бизнес билан шуғулланади. 2022 йилда компания мамлакатда янги завод қуришни бошлади ва 2024 йилда ишлаб чиқариш ҳажмини ошириш ниятида.
Маълумот ўрнида, Украина Қуролли кучлари бош қўмондони Валерий Залужний Британиянинг Тҳе Economist газетаси учун ёзган мақоласида Россия ва Украина ўртасидаги можаро ҳаракат ва тезликни ўз ичига олган манёврли урушни эмас, балки статик ва тинкани қуритувчи жанглар билан янги позицион уруш босқичига ўтаётганини айтди.
Изоҳ (0)