Ғазо секторида Исроил ҳужумлари сабабли ҳалок бўлган болалар сони 3,4 мингдан ошди. Бу ҳақда БМТ Болалар жамғармаси (ЮНИСЕФ) вакили Жеймс Элдер хабар берди.
Унинг сўзларига кўра, Ғазо сектори болалар қабристонига айланган. Жеймс Элдер Исроил ҳукуматини зудлик билан ўт очишни тўхтатишга ва гуманитар ёрдам етказиш учун ўтиш пунктларини очишга чақирди.
“Агар 72 соат давомида ўт очиш тўхтаса, бу минглаб болаларнинг яна хавфсиз бўлишига имкон беради”, — деди БМТ Болалар жамғармаси вакили.
Элдернинг таъкидлашича, Ғазо секторидаги болалар ҳаётига таҳдид “бомба ва миномётлар билан чекланмайди”.
Янги таҳдид сувсизланишдан чақалоқларнинг ўлими бўлиши мумкин, чунки Ғазо зарур бўлган сувнинг атиги 5 фоизини олади.
Кўпгина тузсизлантириш заводлари зарарланиши ёки ёнилғи етишмаслиги туфайли ишламаяпти.
Фаластин Соғлиқни сақлаш вазирлиги маълумотларига кўра, 7 октябрдан бери Ғазо секторида жами 8525 киши ҳалок бўлган. Исроил бош вазири Биньямин Нетаньяхунинг идораси, агар Исроил Мисрдан келаётган инсонпарварлик ёрдами ҲАМАС жангариларига етиб борганини аниқласа, уни тўсиб қўйишини айтган.
Изоҳ (0)