1 ноябрь куни Яман қуролли кучлари “босиб олинган Фаластин ҳудудларидаги” Исроил кучларига ракета ҳужуми уюштирди. Бу ҳақда Яман армияси вакили, бригада генерали Яҳё Сари маълум қилди.
Яҳё Сарининг сўзларига кўра, ҳарбий матбуот зарба йўллаш жараёнини жонли эфирга узатган.
“Оммавий ахборот воситалари роппа-роса соат 12:00 да (Тошкент вақти билан соат 14:00) қуролли кучларимиз босиб олинган Фаластин ҳудудларидаги сионистик тузилманинг юрагини нишонга олган ракеталар ва дронлар партияларини учириш саҳнасини эфирга узатади”, — деб ёзди у.
Яҳё Сари — 2015 йилдан бери Яманда ҳокимиятни эгаллаб келаётган ҳусийлар ҳаракати вакили.
Кейинроқ Яман Мудофаа вазирлиги ресурси ўз веб-сайтида ва Twitter аккаунтида ракета учириш видеосини эълон қилди. Ҳисоботда айтилишича, видеоларда “Яман ракета кучлари ва ҳаво кучларининг Фаластиндаги Исроил кучлари нишонларига зарба бериш бўйича биргаликдаги операциялари” акс этган.
Ракета учирилиши ҳақидаги хабардан сўнг Исроил мудофаа кучлари ўзининг Telegram-каналида Исроилнинг марказий ва жанубий ҳудудларида, шунингдек, Ғазо секторига туташ ҳудудларда сиреналар эшитилаётганини маълум қилди.
The Times оf Israel нашрининг ёзишича, ракеталарнинг бир қисми Исроил ҳаво мудофааси ва қирувчи самолётлари томонидан тутиб олинган, биттаси эса Иордания чўлига тушган. Исроил томонининг билдиришича, ҳужумлар давомида тинч аҳолига ҳеч қандай таҳдид бўлмаган, “чунки ракеталар ҳам, дронлар ҳам Қизил денгиз устида тутиб олинган”.
31 октябрь куни ҳам яманлик ҳусийлар Исроилга учувчисиз учоқлар, баллистик ва қанотли ракеталар билан қатор ҳужумлар уюштиргани ҳақида хабар берилганди. Яман томони “Исроилнинг Ғазо секторидаги агрессияси тўхтамагунча” зарба беришда давом этишини маълум қилди.
Изоҳ (0)