К.Карасаев номидаги Бишкек давлат университетида Қирғизистон президентига ишонч, шунингдек, айрим масалалар бўйича республика социологик сўрови ўтказилди. Бу ҳақда “Кабар” ахборот агентлиги хабар берди.
Сўровдан мақсад ички сиёсат ва халқаро вазиятнинг долзарб масалалари бўйича жамоатчилик фикрини ўрганишдан иборат эди. Социологик сўровнома маълумотларни йиғишнинг иккита усулини бирлаштирган ҳолда ўтказилган:
- тасодифий танлов бўйича телефон орқали сўровнома;
- онлайн сўровнома.
Жараёнда Қирғизистоннинг 7 вилояти ва Бишкек шаҳридан 1 минг 518 респондент иштирок этган. Телефон орқали 818 нафар, онлайн сўровда 700 киши қатнашган. Олинган маълумотлар ягона маълумотлар базасида таҳлил қилинган.
Социологик сўровнома натижаларида қуйидагилар маълум бўлган:
Респондентларнинг 61 фоизи уюшган жиноятчиликка қарши кураш бўйича ҳокимиятнинг қатъий ҳаракатларини қўллаб-қувватлайди. Катта ёшдаги респондентлар орасида бу юқори даражада.
Респондентларнинг 80 фоизи президент Садир Жапаровга ишонч билдирган. 70 фоизи унинг даврида Қирғизистоннинг халқаро нуфузи ва бошқа давлатлар билан алоқалари яхшиланганига ишонади.
Шундай қилиб, сўровнома Қирғизистон аҳолиси орасида амалдаги ҳукуматни қўллаб-қувватлашнинг анча юқори эканини кўрсатди.
Изоҳ (0)